جارى التحميل
استخدم زر ESC أو رجوع للعودة
رمضان زمان يااهل زمان والفرق بينه وبين رمضان الان ؛
الناس اللي عندها 18 سنة أو أصغر ومبهورة بإعلان بيبسي .. احب أقولوكوا ليه جيلنا عينه دمعت .. اصل انتوا متعرفوش رمضان.
رمضان كان تعليق الفوانيس والزينة في الشارع ليلتها
كان صوت أبوك وهو نازل على رجله يدي المسحراتي اللي فيه القسمة عشان يقول اسمك واسم إخواتك كل ليلة
كان تفصيص البلح مع ماما وصوت القرأن الكريم للشيخ عبد الباسط.
كان صوت الشعراوي قبل الفطار
كان لمة العيلة حوالين طبق كنافة وطبق قطايف من غير تلفزيون .. اصل مكانش عندنا غير قناتين ومسلسل واحد وحلقة فوازير وحلقة الف ليلة وليلة فكنا بنعرف نتجمع حقيقي
يعني ننزل نلعب في الشارع بالفانوس ابو شمعة وإيدنا تتلسع في تغيير الشمعة ونبقى مبسوطين
نيللي, شريهان والف ليلة وليلة على ايامنا كانوا يجننوا بس اهالينا كانوا شايفنهم مسخوا رمضان .. واهالينا دلوقتي اللي عندهم إحباط من مسلسلات بتشجع العنف والضرب والقذارة الفكرية واللفظية
عمو فؤاد اللي كان بيعلمنا حاجات محترمة وقيم في كل حلقة و تتر المال والبنون وليالي الحلمية .. اصل مكانش عندنا خيم رمضانية ولا أوتنجز مع ناس .. كانت المودة والحب الحقيقي وصلة الرحم بتحصل بجد
كانت النفوس جميلة وراضية .. كان وقفتنا ورا جدودنا في الصلاة رعب وفرحة وعظمة .. كان حضن أبوك لما تصوم يوم كامل من غير غش فرحة وأمان وشعور بالنضج ولا كأنك خريج جامعة
فرحة اخر عشر ايام عشان بننزل ندور على لبس العيد وشيلة الولاد للصاجات للفرن .. ريحة روح الكعك في البيت تخليك تحس بأدمية مش طبيعية وتبقى مش قادر تستنى صوت تكبير صلاة العيد
عزيزي الشعب المصري: انت مسخت رمضان
رمضان الان نعيشه فى حروب نفسيه وأهليه بين الناس وبعضها
طغت علينا الانانيه والحقد والغل مابين الناس واختلفوا مابينهم على فصائل
لاتعرف حب ولاتعرف دين صح وللاسف قلوبهم بقت سواد
طغت الفرقه بين الاسرة وبعضها مابين اخوانى وسيسى وعلمانى وليبرالى
وكله عمال يتكلم فى السياسه من غير فهم وخلاص
كل هم الناس اسعار البنزين والكهرباء ورغيف العيش ومش مهم البلد تقع ولاتنداس
ايه جرالكم ياناس راح فين الاحساس ؟
حبوا بعضكم وقفواجنب بعض خللى عدوكم يتقهر ويتراجع ويخاف منكم خلوا حياتكم جنه
دى حته الجنه من غير ناس ماتنداس على راى المثل الشائع بين الناس
اتمنى ان يفيق العرب ويرجعوا لعقولهم تانى ويصحوا من نومهم ويقروا تاريخ اجدادهم ويعملوا زى ماهم عملوا زمان خللى الامريكان تتبط وتتهد دة مجرد احساس
ساعتها حاتخاف اسرائيل منكم بجد لما تلاقيكم فوقتوا ورجعتوا امه الاسلام تخافوا على دينكم وتجمعوا شمل العرب بكل قوة وحماس
كل عام وانتم بخير
اختكم /زهرة ياسمين
