يابنت اللذين بقلم الشاعر محمود ضياء محمود

( يابنت اللذين ) :

نفسى ألملم اللي باقى منك يابلدى
بس مين يسمعنى مين
هى دى مصر
اللي كانت ليل نهار تغنى
هى دى بلد الحنين
اللي كان نيلها فرحان بيجرى
النهارده نايم حزين
كل واحد بيقول يارب نفسى
واللي ضده يبقى خاين او عميل
فوقوا بقى جرالكوا ايه
كنا فين وبقينا فين
فين الناس الطيبين
اللي كانوا قريبين
اللي كانوا حته واحده
اللي ياما صبروا ورضيوا بالقليل
الشعب اللي كان وقت الشدة
يقوى يتحدى المستحيل
اللي كان بيحب بعضه
اللي دايما عايش لغيره
اللي كان الكون بحاله
جى ليه طمعان فى خيره
فوقوا بقى جرلكوا ايه
كنا فين وبقينا فين
يا مصر يابلدى يانفس عايش بيه
ياعجينه معجونه من حاجه مجنونه
مقاديرها موزونه مرضت متين مره
قامت قويه معدوله
خدينا ياحبيبتى فى حضنك الدافى
جمعينا يااما واحد ورا التانى
ذنبه ايه ال مات فى مركب
علشان يهاجر على إيطاليا
وﻻ اللي اتقتل علشان جنيه
فى قلب ليبيا
واللي بيدوق المرار فى قطر
والكويت كل ثانيه
واللي اتقتل فى العراق
وفى كل حته
واللي مات علشان رغيف
واللي مات فى قلب جيش
واللي مات فى الميدان
قدام عنيكى
اللي مات اللي مات اللي مات
ذنبه الوحيد انه حبك
ولما كان محتاج ملقاش حتى حضنك
ايه يعنى لما نموت
بس نموت فى حضنك
مش فى مركب او فى مينا
يابلدنا ياحبيبتى
يابنت اللذين
بقلم /
محمود ضياء محمود.