‏مدونة الشاعر \ حسام غانم‏ مع ‏‎Hoda Hafez‎‏ و‏‏13‏ آخرين‏

¤رسالة من طفل فلسطيني¤
ياصاحبي في بلد الأمان
إسمحلي ابعتلك جواب
ماتخافش مش لوم او "عتاب"
فلنعتبرها دردشة
وسؤال مابين إتنين صحاب
انا عارف انت ازاي بتستثمر نهارك
في الفصل ع التخته
في حوش المدرسه.
ويا القلم ويا الكتاب.
يابتلعبوا بعد انتهاء الدرس
بالفيديو او الكوره الشراب
كان نفسي العب زيكم
لكن هنا في القدس وف خان يونس
وف رام الله والخليل
اللعب يابني مستحيل
إعذرني يابني ان قولتلك يابني
منا اصلي معدوم الطفوله
مولود ورجلي في الكهوله.
مش بدعي ابدا بطوله
كان نفسي اكون زيك برئ.
اجري وألعب في الطريق
زي الولاد
لكن ياصاحبي مستحيل
العب وايدي ع الزناد
وطلقتي رمية حجر
منها عدوي بينقهر
وكل رميه تصيب جبان
يرصدني مليون دايدبان
قناص مدرب ع النيشان.
وع المواجهه في الميدان.
وانا كل ما أملك يادوبك غنوتي
وصرختي ودمعتي
ساعة ماتدخل طلقه حيه جتتي
صدقني ياصاحبي البعيد
مبروك عليكم بهجة العيد السعيد
يلا إبتسم
وقوم إلبس هدومك واترسم
والحق زمايلك في انتظار.
لكن انا فيه عندي مليون إعتذار
غير الحصار
اصل النهارده الواد وليد سقط شهيد
ومن عادتنا نودعه من دار لدار
وندفنه أخر النهار
بقلمي/ حسام غانم