.... سؤال فى الحب
============ بقلم عونى هشام
سألت كتير
احب ازاى
عشان قلبى
ما داق الحب
قالولى ارتاح
ودورك جاى
وليه تتعب
معاك القلب

تعيش يومك
كما الحيران
تبات ليلك
قمر سهران
ولما تحب
تتفكر وتتذكر
تعيش ايام ومتكدر
وتنسى
كنا ايه او كان

تشوف قلبك
صبح بستان
ده يزرع
وده يقلع
وآخرتها
تعيش حرمان

شفت كتير
بمآسى
آخاف واصبح
فى يوم آسى

اصل الحب
فى الاحساس
ياريته يدوم
ما بين الناس

حبيب وحبيبه
يتهنوا
وجار مع جاره
بيغنوا

واشوف الدنيا
فيها افراح
مهما غريب
كان منهم
ومهما البعد
طال بينهم
بحب وود
يستنوا

بقول من قلبى
احلى كلام
ياريت بالحب
نتعايش وبينا
سلام
وبعد دا كله
يا معلم
لقيتنى لسه
بتعلم

فنون الحب
وهو الحب
غير كلمة
تكون م القلب
وايد وياها بتسلم
ياريت فى الدرس
نتعلم

اشوف بابا
اشوف ماما
يقولوا تعالى
ياصغير
تقيم فرضك
تصون وعدك
عشان عمرك
ما تتحير

تلاقى كبير
له التوقير
تلاقى صغير
بحنيه
عشان الدنيا
مش هيه

راح الايمان
ماعدش امان
ياريت ترجع
ليالى زمان

تعود اللمة
فى العيله
انا واخويا
مع صفيه
وستى بهانه
وبهيه
بايد واحده
فى طبق واحد
فى قاعده ولمه
بطبليه
عرفت الحب
---------------------
عرفتوه
=============