‏ 

الشاعر الزجّال حمادة البهلوان "بهلوان الشعر العربى"

قَطر الحَبَايب

*********

بقلمى /حمادة البهلوان

******************

قَطر الحَبَايب عَدَّا وفـــــــــــات
فِيه الحَبيب وَيَّا حَبيبُــــــــــــه
عَايشِين سَوَا فى تَبَات ونَبَات
والكُل رَاضِى بِنَصِيبُـــــــــــــه

وانتَ يا قَلبِى حَبيبَك فِيـــــن
سَايبَك تقَاسِى فـ غيَابُــــــه
مَابين سُهَاد وعَذاب وحَنيــن
والحُبّ يا مَحلَى عَذابُــــــــه

عَلَى بُعد بإيديهُم سَلامــــات
أشَاوِرلُهُم ويشَاورُولِـــــــــــى
وأقول يا أهل الهَوَى سَلامات
حَبيبى فين ؟ ياللا قُولُولِــــى

أصعَب عَلِيهم ويحِنُُّـــــــــــوا
ويدَوَّرُولِى فـ كُل مَكَـــــــــان
ويَعَلُّوا فِـ الصُّوت ويغَنُّــــــــوا
ويسألوا بلَهفَة حِرمَـــــــــان

جَدَع حَليوَة بِقلب جَـــــريح
عَشمَان تقابلُوه بِوَلِيفُــــــه
لَو تِفرِشُولُه بُسَاط الرِّيـــح
بَس المُهِم انُّه يشوفُــــــه

والقَطر عَمَّال بِيصَفَّـــــــــر
عَلَى الرَّحِيل عَزَم النِّيَـــــة
و كأنُّه آل يَعنِى اتأخَّـــــــر
و لِسَّه لُه مَحطَّات جَايَّـــة

يَا قَطر مَتهَدِّى شوَيَّــــــــة
خَلِّينى أسأل واستَفسَــر
عَنِ اللّى سَابنى وخَلا بِيَّا
وفـ بعدُه مَهمُوم بَتحَسَّـــر

عَدِّيت نجُوم الليل بالكُـــوم
وكُل مَرَّة تزيــــــــــــــد مُرَّة
واقول يا عِينِى فََارِقتِ النُّوم
تقُول حَبيبى جَاى بُكــــــرة

و بُكرة يجى وهُوَّا مَجَــاش
أتَارِيها بِتصَبَّر رُوحــــــــــى
وروحى تجرى مَتِستَنَّــاش
و يرُد قَلبِى يا طُول نُوحِى

رَجعتِنِى لِهَمّ الحِيــــــــــرَة
وانا اللّى كُنت قَفلت البَاب
و نسِيت خَلاص التَّكشِيرَة
مَع إن سَهم الهَوِى غَلاب

مِنِ اللِّيلادِى هَانَام وانسَـى
وهَاقفِل البَاب مِن تَانـــــــى
واعنِد عَلَى قَلبِى وأقسَــى
وارجَع واعيش كِدَه وَحدَانِى

يَا قَطر سَافِر وانسَانِــــــــى
و شُوف طَريق تَانِى غِير دَه
أنَا مش هَاجَدِّد أحزَانِـــــــى
وخَلاص أخَدت عَلَى الوِحدَة