أنا بِحُبِّك مِتهَنِّى

شعر/محمود العزب
5/6/2015

أنـا بِحُبِّـك مِتهَنِّـى
وباكتُب أشعار وباغَنِّى
وبالاقى إنِّى ملان إحساس
من حبِّى فيكى يابِنت الناس
وربِّـنـا مايخـلِـف ظَنِّـى

والاقيكى بِتزيدى مَشاعـرى
وبتنجِدينى من سَهَرى
وتكونى ليَّا قَمَر ونَّاس
ولاتسيبينى فى يوم مِحتاس
وتبعِـدى الأوهـام عَنِّـى

وتبادلينـى أحاسيـسـى
وتِبقى فى الضَلمهْ ونيسى
ولايبقَى فى قلبِك وِسواس
مِن ناحيتى وتصَدَّقى ناس
بِتخَوِّفِـك على طول مِنِّـى

وتخَلِّى قلبِـك على قلبـى
وتقَـدَّرى دايمـاً حُـبِّـى
وانا حُبِّى ليكى زَىْ الماس
وانتِ اللِّى طول عُمرِك ع الراس
وحُـبِّـك انتِ مِلازِمنى

وانـا بِحُـبِّـك مِـتـهَـنِّـى.