قصيدة قطر المحروسة
=============
اكلت مانجة وبسبوسة وركبت قطر المحروسة
وقلت اشوف يعنى بلادى واحضن عبيرها فى فؤادى
واخدت ركن جنب الشباك وسرحت فى مناظر اسماك
فى النيل ومادد فى فروعه وبيطوى خيره فى ضلوعه
يغسل قلوب وتاريخ حضارات قبلى وبحرى وانتصارات
ومصر شجرة ومحروسة وشعورها دهبى وننوسة
خضار وزرع بطول النيل وطبيعة ساحرة وشكل جميل
والقطر يجرى فى المسارات ويقف يحمل فى محطات
صفارته عالية مدوية تقول دى مصر العربية
وبياعين طالعين نازلين يبيعوا اكل وشرب كتير
وناس صعايدة وفلاحين متلونين ده بطمى النيل
عمال وطلبة وموظفين ستات بطرحة ومزارعين
مقبلين ومبحرين بحكاوى وهموم مشتركين
ادى مسعدة واخوها ده ياسين رايحين يكملوا فى التعليم
وهريدى ده شارى له قيراطين ولابس فى لاسة وعمامة شبرين
وباتعة شايلة فى بط سمين رايحة تبيعه فى سوق الاتنين
وصميدة حصد الزرع خلاص وجاب له زلعة وكم بلاص
ونازل يجهز فى بناته ويجوز اخته واخواته
وحميدة طلع فى مشلتت وبدا ده ياكل ويفتفت
وزنق فى قفة عم عماد حمام وبط بكل عناد
وبريشها عامل فى مخدات وقاعد يعد فى فلنكات
وشخيره واصل للدلنجات واحلامه بيضا وسودا ساعا
وعزم على بفخدة قريش وقال لى كلها من غير عيش
والمش مخمخ فى نافوخى ودوده زغزغ فى ضلوعى
قلوب بطيبة وحنية وسلاحها فول مع طعمية
واصول عريقة فرعونية رمز الحضارة المصرية
والشمس غاربة معدية تغسل شعورها الذهبية
فى النيل بخفة وملاغية وتحضنه بكل حمية
وعلى ضفافه كتير اشجار واقفة تصقف باستمرار
وفروعها ظل وشمسية بتغنى مواويل شعبية
وهو اعظم الانهار عمال بيجرى ليل ونهار
يروى عطشنا واراضينا ويزيد فى خيرنا لاهالينا
هو العريس جاى لعروسته وبيحب مصر منذ طفولته
ياسلام عليكى ياعروسة ابوس ترابك مليون بوسة
واهديكى وردة وبسبوسة من فوق ده قطر المحروسة.
مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون