(مجلة كل الخواطر) اصعب شئ -------------بقلم الشاعر \عبد الله السايح

........(أصعب شئ).......
اصعب شئ إنك كداب
كدب وكان مرسوم ع الوش
من كتر الكدب الصدق غياب
فرحة عمرك لما تغش
فاكر إن ذكائك جاب
عصفورك من قلب العش
المرادي ذكائك خاب
عقلك بعتة يادوب بالقرش
فاكر إن فتحت حساب
وفاتح باب للحب تهش
المرادي خيالك غاب
حتى الكرسي سقط.م العرش
وحياة قلبي العيشة عذاب
والنار من جواك هترش
يعني هتبقى العيشة هباب 
احسب كدبك بيع ع الفرش
صعب تجيلك ع الطبطاب
اللي حفرته فيه هتخش
مهما إن كان الحلم سراب
راح تتمنى في يوم وتقش
لما قرأت لك يوم في جواب
بعد ماطفح الكدب بغش
من تأليفي وكان فيه عذاب
وإتمنيت كلمة معلهش
بس لقيتك قافل الباب
نازل هرس ورزع ودش
كدب تقول أنا عندي كتاب
وإتلككت ونازل حش
بس كشفت هوا الأحباب
بعد شهور كان عقلي غياب
ولقيت حب في صورة وحش
صياد شاطر في الألعاب
بس ضميره مات ولا تاب
كداب عايش أفش في أفش
فاكر إني ركبت سحاب
خبى شعاع الشمس وغاب
كداب لكن فيا ماعابش
عاش في الحب وقلبي وداب
خاد من عمري كتير وماساب
بس الكدب كتير وماسابش
وإتمنيته عش بغاب
بس لقيت الشوق قلاب
حلم وضاع إزاي ماعرفش
..........(شعر)............
عبد الله السايح