#أنــا
.....
أنا أحسن واحد يصبُر
وأخرته مينولش
أنا أكتر إنسان يتألم
وميتكلمش
دايماً ساكت ومكشر
وماليش في الألش
طيب مجنون بتعصب
إزاي متسألش
أنا حد ساعات تلقاه فاضي
يتفلسف يعمل فيها قاضي
وساعات أتنازل عن حقي
وأسامح وأنسى وأكون راضي
أنا قلبي بيعشق ويسلم
وبيخسر كل اللي إرتاحله
ساعة يبكي وساعات يتألم
و الفرح بيرفض يفتحله
أنا طفل مشاعره يتنطط
مسكون من جواه ومتعفرت
أنا فاهم عامل مش فاهم
أنا شاري دماغي وبستعبط
أنا شاعر لو تسمع عني
أنا رسام برسم كتاباتي
أنا درويش لو طلبت يعني
تلاقيني بايع كل حاجاتي
أنا دافن جوايا كتير
أسراري وأسرار الغير
أنا بسرح بخيالي الواسع
وبغمض عيني وبطير
بحب حاجات مش موجودة
تلاقيني تملي أتمناها
بحب الصدفة لو مقصودة
تكون مع بنت مسيري ألقاها
بحب الجد والمظبوط
لو ماشي في أي طريق
وحبل الود لو مربوط
في قلبي وياَ قلب صديق
بحب الوحدة لو مخنوق
عشان لا أشكي ولا أفضفض
بكلم نفسي في مرايا
وأسراري ميعرفهاش ولا مخلوق
دافنها في قبر جوايا
.....
#عمرو_كندوز