الله أكبر ..........!!
زلزلت قلوب حجر
دا عدو خسيس 
وم ينحسبش من البشر
وعيون بتسهر لجلنا 
بتشوف عذاب لجل
ما يعيش شعبنا
هي الكرامة اللي باقية
من غيرها....
نبقى زي ثور ف ساقية
وجنود تموت
علشان تعيش انت وانا
كان القمر مخنوق
هايم وقاتله الشوق
والشمس كانت بتبكي 
محبوسة جوا الشروق
والنكسة... كادتنا 
ساكنة في حارتنا
عايشة في سكتنا
بتدور جوار غيطنا
والقلب م الهم انفجر 
وطلع النهار .......!!
والفجر جا والهم غار
واسأل كمان جندي
كان ضاق طعم المرار
وقائد حكيم أخد القرار
وعيون دابت من السهر
كتبوا بدمهم معاني النصر
واستشهدوا لجل عيونك يا مصر
واتسحروا جوا الكتايب 
صلوا في سينا العصر
والشمس بكت من الفرحة
وبلدنا لابسة الطرحة
حتى النجوم رقصت ويا القمر
إبراهيم بدر عبدالله