توهان....!!
.
الكل دماغه عالية و موزونة
ده كيفه بملايين
وده كيفه بملاليم
والكل متاح...
مسا و صباح
. 
أسهلك تجيبلك شريط
و أستفتح يا عبد الفتاح
و سيبك من طابور العيش
ده بصريخ و ده بنواح..
.
المهم تغيب و تضيع .
عن هم فظيع
و تشوف الدنيا ربيع
اشتراكية كلنا عايشنها
.
غني زي فقير
مفيش فينا محروم
ولا حد في كيفه مظلوم 
.
وحكومة الله يعينها
حاطة مزاجنا قصاد عينها
.
بتفكر تصرف الشريط ع التموين 
زي مابتصرف كارت البنزين
.
والمينا لا بتهدا ولا بترتاح
و دنيا سداح مداح
ومراكب فراولة وتفاح
جايه ل عبد الفتاح
و السماح طبع الملاح
.
وسلم لي علي البوابة
اللي بوابها متسابه
.
اصل الكيف طبعه ديمقراطي
بيساوي العالي بالواطي
المهم كله متعاطي
.
و الباشا مبسوط من حالنا
ما يطقش شيء ب يعكرنا 
ماهو عارف ايه اللي بيسعدنا
اصله شاري دماغه و دماغنا
بيحب يغيب و معاه بيغيبنا
وسنين العمر تشيبنا
.
ونشوف بكرة سراب
أحلام خاطفها غراب
.
و سلم لي علي حقوق الانسان
في عالم ضاربه الادمان .
.....................( حسني الجنكوري ) .