(مجلة كل الخواطر) سجل يا تاريخ ..ج3 -----بقلم الشاعر \عصام دويدار

سجل يا تاريخ الجزء الثالث 
الثوره رقم ( 1 ) 
البدايه 
وبعد ما أبهروا العالم 
وداسوا الظلم بالجزمه 
وقف يتفرج العالم 
ومن أزمه علي أزمه 
مفيش حاجه بتتغير 
مفيش لقمه مسكها فقير 
وآدي البرلمان غَيَّرْ
ولبس توب إبن عم حديد 
وآدي بداية السكه 
كانوا الاخوان علي الدكه 
رفضوا ينزلوا الشارع 
بداية ثوره بتصارع 
غاز وضرب م الشرطه 
قاموا اعلنوا علني 
وقالوا الطاعه للحاكم 
انا فاكر التاريخ بالظبط 
25 يناير
تاريخ شعلة بداية النبض 
شباب فتح في أرض البور 
نزل مولود في قلب طابور 
رفض يتذل زي أبوه 
وجده وعمه واللي جابوه 
الكل كان بيتفرج ويضحك 
والشباب بيموت ..............
وفجأه الشعب يتحرك 
ويضرب جبنه بالنبوت 
ولما المركبه مشيت 
نزلوا الاخوان مع الثوار 
وكانوا القوه والمنشت 
وكانوا منظمين شطار 
وزاد الضغط في الشارع 
علي الشرطه وعلي حاكم 
وكل حزب كان خايف 
بقى شايف ميدان تورته 
نزل يلحقله كام حته 
خلاص الظلم بيفرفر 
خلاص إرحل ...............
طعم التورته دي مسكر 
ولا واحد هنا فكر 
من إخوان او احزاب 
او النخبه اللي في البرواز 
غير في التورته يكلوها 
حبيبتي يامصر 
عصام دويدار