(مجلة كل الخواطر) سجل يا تاريخ ------- بقلم الشاعر \عصام دويدار

سجل يا تاريخ الجزء الاول والتاني
سجل يا تاريخ
……………………..…………
فجأه قامت ثورتين
ثوره علي ٣٠ سنه
وثوره علي سنه ويومين 
تلاتييييييين سنه
عشنا فيها مطحونين
متغربين متأمنين
دولة فيها تنميه
تنمية متغميين
طابا رجعت بالسياسه
وسينا عامت في السياحه
ولما كان ريسنا ياخد وقت راحه
الصراحه
الغلابه مصيرهم أيه ؟
….يرجعوا…مترحلين …………
مليون كمين
وعيشه طين
وحظه إسود
اللي ينزل في الكمين
رايح فين ؟
جاي منين ؟
رد يابن (……….)
علي كام قفه
علي شلوطين
والتنميه
قرض من دوله بربا
تنميه متشقلبه
مستثمرين
من كل مله وكل دين
واخدين أراضي بدون تمن
وكمان ياساده مدعومين
دعم أحسن م الفقير
ودعم تاني نشتغل
عشان عيونهم خدامين
تنمية أخر زمن يا مؤمنين
مفيش ضرايب
يادي المصايب
وهما والدوله حبايب
متأمنيين دافعين رشاوي
للوزير
انتاجهم محظور ع البلد
انتاج تصدير
مدعومين ومصدرين
والله كانت حاجه طين
بس الامانه مفيش حروب
ريسنا كان ريس محبوب
لا تكنولوجيا ولا جولوجيا
علي ايه هندخل في الحروب
شعب مستهلك وبس
عايشين حياتنا هس هس
علي كل معاهده موقعين
حظر نووي موقعين
حظر شهري موقعين
حظر سنوي موقعين
ممنوع نعيش متقدمين
في ناس جيرانا زعلانين
وعشان مندخلش ف حروب
لازم نقول ديما آمين
في شرع مين يا مؤمنين
والله كانت حاجه طين
……………………....
كل يوم الصبح نسمع أغنيه
عايزنها تبقى خضره
الارض اللي في الصحرا
……………تشكا …………
قالوا الخياره هتبقى متر
والكوسه فيها هتبقى شبر
وتشكا ياصحبي فجأه ماتت
لا طولنا ورك ولا حتى صدر
والصحرا رجعت تاني لينا
زي سينا باعها بالمتر ف مارينا
تقولشي يابني ربنا غضبان علينا
رصف الشوارع تنميه
بس الامانه متعبه
يخلصوا رصف الطريق
ويتحفر تاني من هنا
يتحفر علشان مجاري
ويترصف بعديها تاني
ويتحفر تاني من جديد
هيدخلوا التليفون ياغالي
إفرحوا دا الليله عيد
فساد وماشي في البلد
زي إبليس في الوريد
طبقه بتعلا في السما
وطبقات عايشه علي الحديد
هتقولي بردوا في أمان
هقولك شعبنا كان جبان
كان يخاف يرتاح في يوم
تاني يوم ينام جعان
……………………..…….
الي اللقاء في الجزء التاني
سجل يا تاريخ 
الجزء الثاني 
……………………..…
ولسه في التلاتييييين سنه 
الحزب الوطني والمعارضه المُحْزِنَهْ
في البرلمان كانت الكراسي مقسمه
أصواتنا كانت ورقه وسخه معفنه.
…حاجه مقرفه……………
درس وأخدناه بالشفا
كل حكومه كانت حكومه معلمه
متضامنين ماشيين بسرعة سلحفه
حاجه مقرفه
……………….الخصخصه …………
شركات بتخسر م الفساد
بدل ما يعالجوها باعوها
والتمن حفنة تراب
والمحسوبيه المتداريه
والرشاوي ال١٠٠ …١٠٠
محتاجه ولا مليون قضيه
رجال أعمال مستثمرين
يعملوا منهم حكومه
بأي مله وأي دين
نآمن الديب ع الغنم
ردوا عليا يا مؤمنين
والله كانت حاجه طين
……………………..………
الشرطه في خدمة الشعب
والشعب خادم الوطن
والوطن خادم الجميع
حكومه يعني موظفين
من الرئيس الي الغفير
والشعب خادم الوطن
والوطن ملك الجميع
……………………..…….
حلم غاب عنه الوطن
والشعب بقى حلمه السفر
والوطن أصبح خطر
راضي تعيش من غير سكن
وتلحس تراب ارض الوطن
الشعب اصبح في والوطن
ساكن غريب
بيسرقوا خيره ويدوه للغريب
شيئ عجيب
……………………..………..
حاربنا ورجعت أرضنا
وسينا رجعت حضننا
لكن الحقيقه المؤلمه
نفس اللي حاربناه زمان
الغاز بياخدوه مننا
حاجه مُخزيه
يحتلوا هما ارضنا
وياخدوا غاز من عندنا
والله حاجه مقرفه
تعليم مشلول
تموين مسروق
بترول محروق
شباب مخنوق
أحلامه إنه يسافر بره
يتغرب من قاره لقاره
تاهت معالمنا يا خساره
الظلم واضح زي الشمس
والحق محتاج نضاره
……………………..…….
الثوره رقم ١
الي اللقاء في الجزء الثالث
بقلم / عصام دويدار