غصن بيبكى من شحروره )
لزما حتما ساعة الجرى
تبقى سريع
شمَّر وقت العدَّة هاييجى
وقت رمادة
ولحظة جوع
مارسون هربك من أفريقيا
لكوبنهاجن
أصل شيكاغوا
بتعرف تادن
فرن العيش محتاج له
العاجن
صب القهوة وصحصح روحك
واخلع عنك سرب جروحك
طفى النار الخارجة بفمك
سكِّت همَّك
طفِّش رعد السأم النازل
فوق شبابيكك
وامضى ف شيكك
للى محاصرك
جوا الذات
حزمة قات
ها تعدى الدنيا
وتمرح فوق جبلاية القط
وتحضن حتى شروق الشمس
خط بخط
أمِّن باب الصبح بليل
يا الله اتعاهد
برا الدايرة بالمرتزقة
وألف عميل
صبرا ياسر
دنيا فتاتها ما اتشبعشى
واللى ما باعشى
هايشرب كاسه بلذة وأمن
قلب الحب تملِّى بحِن
لسفرة بعيدة فى المريخ
أرضه الحمرة بتعشق فاتح
يقهقه فيها
لو بصْرِيخ
رشفة نغمة بقلب كمانجة
تهدِّى الروح
بيضة وريشة وطير
مجروح
وغصن بيبكى من شحروره
ف عصفة ريح
سما بتمطَّر عزا على حالنا
ومقرىء باقرأ سورة البقرة
نامت السَّكرة
ما جاتنا الفكرة
مين بيشد عباية الصدر
هاتقطع منُّه
وغزل الثورة هاينقض نفسه
بدر الليل بيطحَّن عرسه
ليه الافراس بتهاجم النسمة
وليه أحزانا بنضحك ليها
ونقول قسمة
اسحب كل رهانك واهرب
انت الخاسر
وانسى البسمة
ووجِّه ألف رصاصة لموتك
لما القطر يعدِّى عليك
ويفوتك
ودخِّن حسِّك وافضل اصرخ
انك خارج
من ملكوتك
انك خارج من ملكوتك
ـــــــــــــــ
القات : نبتة يمنية تمضغ للتخدير حرمها البعض
جبلاية القط : الشاعر عبد الرحمن الابنودى
صبراياسر : من الحديث النبوى
الشاعر وحيد راغب