جارى التحميل
استخدم زر ESC أو رجوع للعودة
أنا مرة سألني سجاني
وقالي ايه اللي رماك
أنا شايفك مش انت الجاني
أنا عمري م هكون وياك
قالي أيوة أنا السجان
لكني بحب ...الشجعان
وشجاعتك ديت عاجباني
شوفت النور بيشقشقلي
وهناك حرية بتندهلي
وفتحلي الباب السجان
لكن النور أصله عماني
مكتوب عليا أكون سجين
أقضي حياتي ورا الزنازين
دايما يابلدي أنا الحزين
أنا مشغول بيكي ورامياني
أنا زي البلبل الحيران
ممنوع أصلا م الطيران
حبك دابيجري ف الشريان
يابلدي أصل انتي كياني
من عشرومية ألف عام
وبقول عنك النبأ الهام
وكلامي مش أي كلام
وبتدي لغيري وحارماني
ملعون القهر اللي أنا فيه
ملعون الشر واللي حاميه
ملعون الباشا والبيه
م كفاية إهانة يازماني
أنا كل دقيقة ليا سنين
وطول عمري اصلي حزين
لكن الناس التانيين
يتعدلهم الدهر ثواني
شوفت فيكي كر و فر
كله أصبح حرف جر
انا دوقت فيكي الحلو مر
و اللي بانيكي كان حلواني
كله بيتكلم ويخبط
ماسك طباشيرة وبيشخبط
أنا ملخوم ومتلخبط
أنا ماشي فيكي عمياني
ابراهيم بدر عبدالله
