مصر في الأفيش
شيخ بيشرب حشيش
في حضرة دراويش
بيمدحو الخالق
بره الصور شاويش
بيبلطج ع الألضيش
عنده العدل مفيش
ولا ليه في الخير سابق
الناس عايزه تعيش
بتخاف م التهويش
وساعت رمي البقشيش
فوق بعض تتسابق
في القهوه عم جاويش
بيلمع بالورنيش
جزمه ما تساويش
لعم أمين صادق
وفي الجنب نازل بالبيش
والبفه لازم تعيش
والقفله متكسبنيش
ولو م الورق سارق
العشره ما تزدنيش
ثمن البوفيه والنيش
والمهيه ما تجوزنيش
وقلبي العاشق يموت ولا يفارق
أخر الشارع مستشفي أبو الريش
نقص دمي وحيلتي ما يسعفنيش
والحرب قايده في العريش
وأنا دونا عن الناس مش فارق
في العنايه ردو الشيش
وعيني بتدمع
خدو دم الحرافيش
فرطو دمي ما أتجمع
قالت لي ما تسبنيش
كنت أنا بتوجع
صوت البكا سمع
ومصر في الأفيش
ع النيل بتتدلع
خدوني مني ومردونيش
كف الايد علم في الفيش
وكفهم علم ف قفاي
يا أبن بلدي متسجنيش
أبن بلدي كان نساي
كركر من النغاشيش
ولع الكانون ع الشاي
حكم الخفافيش
مفيهوش ليه وأذاي ؟
شعر الصبيه كرانيش
وأنا قلبي ديم غناي
فتلته وتر وريش
بكي الحجر والناي
من أمتي الحمام بيعيش؟
فوق بركان غلاي
كسرو الجناح والريش
كسرو فيا هواي
والدنيا ما تساويش
لحظة هوي
ومصر في الأفيش
عليل مالو دوي
وفي حضرة الدراويش
كنا سوي
بصيت أنا ع الأفيش
في الدنيا مالكتنيش
غير بسقي المعاني حروف
والحرف ما يرتوا
‫#‏أحمد_الماحي‬