طقس شوكُه زى سيف )
البلاهة ليها ناسها
والعمش بيحط ضلمة
ع القلوب
ورعيل ببخ الجرح سِمُّه
جوا دمه
صاعقة بتصنع خطوب
جلب صوت الرعد صنعة
والبروق بتحيض يا دوب
رمش روحك طال بغمزُّه
بس ما تمكنش من
تقوى وتوب
كنت ساكت والمغارة
صخرة سدت بابها صاحت
كل واحد يدعو دعوة
يوم ما جاله شوشو يغوى
ايه حاصله
و انتصر على ذاته ولا
نام ف عروة
يا بساط الحس صحصح
كلِّم الفلاح وقوله
حرف أرضك معجزات
دوقُّه عرقك وفاسك
واحتراق العشق فيك
والآهات
اللى يسبح جوا طشت
زى سابح ف البحار
المضايق والبوغاز
واللآلىء والمحار
والسهام الراشقة فينا
والمسار
خير ما تعمل بنية
تلقى زيُّه لُحْمَة سدَّت
ثقب طازج
واللى قيِّم عمره ما
يقدر يغيِّم
البلاهة سوط وبلطة
طعم خلطة
مر حنظل
حر غامق ف الصحارى
عصر نارى
والشجر مالوش وجود
طقس شوكُه زى سيف
والخدر طف الحدود
أرَضَة زرقة فتِّت
واستنام منها السدود
بتنا ف ضحضاح مشاعر
والمواخر زاد مزارها
كاس ورقصة وكعب عالى
والقصور حمامها غالى
بس زوِّد ف البلاهة
المتاهة بقالها شعبة
علمى ..أدبى ..أو خليط
لو تبلبط زى بطة
أو تزِِيط
تنتظم عندك مرايتك
والوشوش تصبح شطوط
منها هاجر طير بيبحث
ف الشوادر
عن نسيم
الغيوم فقست نابين
مطرت لكن سديم
البلاهة عرض مسرح
توم وجيرى
والمصارعة ف كل مطرح
ايه هايثمر غير مطاوى
أوسنج
وسيوف بترمح
قبل ما نعد الخيول
الشاعر وحيد راغب