جارى التحميل
استخدم زر ESC أو رجوع للعودة
ومهما الصوت يكون واطي
أنا ح أصرخ وأنادي وأبوح
ياناس القدس بيعاني
خلاص فاضل طلوع الروح
ليه صوتي ماهوش واصل
وليه أكبر مافينا غافل
ليه سايبين هناك سافل
وهتك العرض شيء مسموح
سواد الليل بلون شالي
وفوق داري الطيور بتنوح
بقالي سنين بقول مالي
لقيت صوتي كمان هيروح
ومش من طبعي أشوف جاري
بيصرخ والصريخ عالي
وأحط القطن في وداني
وأغمي عيوني لو مدبوح
ومهما الصوت يكون واطي
أنا ح أصرخ وأنادي وأبوح
يا أمه المجد فيها غالي
خلاص ريحة القبور بتفوح
ح أشيل الذل فوق راسي
وحتى الراس كمان مبطوح
صباعك ع الزناد مبتور
وسيفك ليه صبح مكسور
وصمتك خلى عدو مغرور
يبيع أرضي بمزاد مفتوح
ومهما الصوت يكون واطي
أنا ح أصرخ وأنادي وأبوح
ياناس القدس بيعاني
خلاص فاضل طلوع الروح
بقلم /طارق شامخ عبد الجواد
