(مجلة كل الخواطر ) شوية مطر- للرائعه / ابتسام عوض حسن

شوية مطر
نزلوا وغرقوا المكان
قالتلي انا
مش حلم بمنام
حاقولك الحكاية
بس اسمعيني
للنهاية
وتغيب شويه
وترجع شويه
وعيني عليها
رايحة جاية
شوية مطر
قالتلي شوفي
حنتك مرسومة
نقش في
كفوف إيديا
وحياة عينيكي
صدقيني
وماتكدبيني
قولتلها
انا حلمي
اكون وسط
المكان
وتنزلي واخدك
في حضني
وتغسلي
دموع سنيني
وتعطري وتسكني
ربوع الزمان
قالتلي انا
بيكي وليكي
انا ضحكة مرسومة
على الحيطان
شوية مطر
بقولك يالا غرقيني
وشوقيني
نسيني جرحي
من اللي كان
قالتلي طيري
وطيرتني
ولففتني وحيرتني
ومرة واحدة
راحت سابتني
في نفس المكان
وقالتلي حان وقت
الرحيل
واوعي تبكي
المستحيل
ولا تقولي خسرت
الرهان
شوية مطر
حسستني إني
سعيدة
بتولد بروح
جديدة
وحلمي مكتوب
على البيبان
ومشيتي
لكني فرحانه
برؤيتك
وبطلتك
وبهلتك
يا ساعة جنان
وهمسة
حنان
بقلمي عاشقة شوية مطر ابتسام عوض حسن