يادرب الموت
********
يادرب الموت كفاية عذاب كفاية غرام
لا أنا عايش ولا ميت ولاصاحى ولا عارف بغدرك أنام
أنا تايه مع سكوتك مع صوتك وماشى والطريق ألغام
أنا الذكرى أنا الماضى أنا الحاضر أنا اللى بعيش معاك أوهام
أنا فى تيابك إتغشيت وبيك ضليت وياما بكيت من الآلام
ياداير تشتهى فينا لنفس الدار مودينا وسارق جنه الأحلام
يادرب الموت كفاية حرام
ونفس ضلام ونفس غيام ونفس الخوف مغطينا
سواقى النار فى وسط جدار بكاس الذل تكوينا
زمن إيه اللى فيك غدار وقلب العار بيسرق منا ماضينا
ولا عشنا ولا كنا ولا روحنا ولا للدنيا دى جينا
يادرب الموت طريقك فوت خلاص بعدت خطاوينا
ياصوت مكبوت رحل مايعود صبح صورة ف ضواحينا
طريق الموت فتح بابه مع كتابه وداير فوق نواحينا
سواد إيه اللى داب فينا ترك عبرة بنحكيها ف حكاوينا
يادرب الموت أنا منك خلاص مليت لوحدى بكيت غناوينا
ترابك نفسه يحينا ولا الدنيا ولا زمنك ولا تمنك يبكينا
يادرب الموت ساعات وتفوت نشوف إيه إنكتب لينا
محمد سالم
