جارى التحميل
استخدم زر ESC أو رجوع للعودة
لأنى باعيش ف كون تانى
ذاكرت كتير وتوهنى شرود صوفى
ازحزح طوبة ورا طوبة
عملت الجنة من خوفى
أنوح حبة
وروق حبة
وبعبع منى ف صراخى
واقول للروح قومى طوفى
أبلبع حرفى كمخدر
واتخيل حصان قلبى بيسبقنى
ويمسح دمعى وكسوفى
لأنى باعيش ف كون تانى
وافلسف عيشتى وظروفى
ماليش رجلين
كطير سابح ومش راضى
يحط ف يوم على غصونه
بيشعل ذاته ف جفونه
وبيرفرف بدون رجعة
لماضى الأرض
وبيغنى ع اطلاله
ويعزف نوته من نافلة
لمليون فرض
يا سارى ف الحشا دمى
لمين همى أبحبح له
وجوايا دروس ساكنة
لغات شتى
وميت لكنة
شعوب بيضة
شعوب داكنة
شعوب مغلوبة ف الركنة
واطير منى لكون واسع
يلملمنى
ويحكمنى
ولكنه يوزعنى على اعضائى
يرجعنى لكون داخلى
يسلمنى مابين نفسى
وبين عقلى
وقلب بيمنح الاختام
على جداره نقوش ذاتنا
بتشرح قصة الواقع
وبتفسر رموز الاحلام
الشاعر وحيد راغب عضو اتحاد كتاب مصر
