قبل ما أنسى فكرونى للشاعر : محمد ضباشه

قبل ما أنسى فكرونى
للشاعر : محمد ضباشه
قبل ما انسى فكرونى
باللى كنت فى يوم معاها
من أول ما عرفت أحب
وقلبى هرب منى ونداها
وأن نسيت أبقوا أعزرونى
أنى طاير فى سماها 
بشتكى لنجومها حالى
وعلى اللى كان حابب هواها
مهما كانت باعده عنى
عمر قلبى ما يرضى ببكاها
--
قبل ما انسى فكرونى
بانى منسيتهاش فى ثانية
حتى ولو كنت فى دنيا
وهى عايشة فى دنيا تانية
دايما معايا وجوه قلبى
نور على جدرانه باينة
وقبل ما أنسى صدقونى
وأوعوا تانى تصدقوا
أن أحنا توهنا فى الطريق
والقلوب أتفرقوا
ومالت سفينتنا وغرقت
مالقلوب أتشعلقوا
بموجة جاية مليانه حب
وعيونكوا لينا ما حققوا
--
قبل ما أنسى فكرونى
وأن غلطت أوعوا تلمونى
لوموا ناس كرهت وجودنا
حطموها وحطمونى
بس راجع تانى ليكى
وأفتكر فيكى صبايا
وانسى كل اللى خانونى
وافتكر اللى فضلوا اليوم معايا
والعيون على القلب صاحية
تحكى لنا ألاف الحكايا
اما كنت ولما كنتى
قومى بصى فى المرايا
شوفى مين جوه فى عيونك
وشوفى مين حبى ومنايا
--
وقبل ما انسى فكرونى
وأوعوا تنسوا تفكروها
مين كتب على القلب أسمه
وعلى الجواب ابقوا اسألوها
ومين دايما كان منور
لما كل الناس عموها
قاد صوابعة العشرة شمع
وماعرفوا غيرها ينوروها
وقبل ما أنسى فكرونى
واوعوا تنسوا أنى فاكرها
قلبى دايما كان معاها
عمرة مادق لحد غيرها
وأن لقيتوا منها حيرة
أرجعوا تانى لضميرها
وأسألوه عن حبى ليها
والجواب ... هيكون مصيرها
--
قبل ما انسى فكروها
مفيش حاجة مستحيلة
ومهما دقنا من جراح
بينا بردوا حاجات جميلة
نفسها نضلل عليها
ويقولوا فعلا ناس اصيلة
نخاف عليهم م الهوى
فى دنيا أحبالها طويلة