مجلة كل الخواطر:: عملت حساب الزمن ..؟ :: بقلم المبدع الراقي أ / مراد مصطفى مراد

عملت حساب الزمن ،،،،،،،، ؟
لما تجور عليك الايام وتدوس
لما ييجى عليك اليوم
وتميل على ايد الخسيس وتبوس
لما يبيعك الزمن من الحاجة ضناك بفلوس
لما تلاقى مرض النفوس عشش فى القلوب
ومن شفاة خلاص بقى ميئوس
عملت حساب الزمن
لما تلاقى بيت الاصيل مفهوش
لما يقولوا للحكيم ملحوس
ولما فى يوم يقولوا للنصيب منحوس
عملت حساب الزمن
لما تنطق فيه بكلمة حق
يقولوا عليك عميل مدسوس
عملت حساب الزمن 
لما تلاقى الضمير مغشوش
لما تلاقى عرض الشريف منهوش
عملت حساب الزمن
لما تلاقى شىء من العدالة والميزان منقوص
لما تلاقى توب الحثالة على الجلود ملبوس
لما تلاقى عرق الرجال والفقير ملطوش
عملت حساب الزمن
لما تلاقى الزرع الأخضر 
من بركتة بالمبيد مرشوش
لما تلاقى شعر الولاد متسرح 
يمين وشمال وزى ضهر الجمال منكوش
لما تلاقى فوق البيوت غزا بيتك طبق اسود
خدش الحياء والعفة وأسم التقدم دشوش
لما تلاقى فى ايد الولاد 
كل يوم اختراع اتصال وجاسوس
أنا مش ضد التقدم لكن ضد فكر النوم 
فى العسل وتغييب مجتمع تظهر فيه التيوس
فينك يا زمن المبادىء فينك يا زمن الليوث
لما تلاقى بطون الرجال بره وبقلها كروش
لما تلاقى الحرامى حر والبرىء محبوس
لما تلاقى غلبان هو ومراته
وسته سبع عيال فى اوضة واحدة
عايشيين زى الشوال مكبوس
لما تلاقى موظف فى اخر الشهر
خلص مرتب وبقى فى وسط العيال مرووش
وبدل القمح والخير فى البيت يتخزن 
عاملين حساب للشر وبالرصاص متروس
لما تلاقى العفاف والطهر خاف واستحى
والشذوذ انتشر والفحش ورب البيوت ديوس
لما تكون قاعد تشاهد مسلسل انت واولادك
وفجأة تلاقى فيه اوسكار مهرجان البوس
لما تلاقى عندك ضيوف او مصنع وعمال
او ولادك بيذاكروا الدروس 
والنور يقطع عليك تلوص وتحوس
لما تلاقى الشباب على ايديها رسوم
واستبدلوا الصلاة المفروضة باشارات وطقوس
لما تلاقى السيجارة فى فم الولاد غذا مغروس
لما تلاقى الهباب والبانجو ونوع الحجر مرصوص
آه يا زمن آه حظك كده يابا
جيت تربى طلع الشباب موكوس
شربوا الفشل والخيبة 
ومن مر الحياة شربت انت كوؤس
يا عينى يا ام العيال وانتى كمان
اخدتى من طلق الولادة فوؤس
عملت حساب الزمن
لما تلاقى للنفاق والكدب
الف ياما وشوش
لما تلاقى قتل البشر بالسهل
قدام عنيك كل يوم صف نعوش
لما تبص تلاقى طلع عليك من الوادى
بدون راعى غنم من الحوش
لما يمسك على بلدك سلاح
بشر بعقل جحوش
لما تلاقى كلنا حاكم بدون مرؤس
لما تلاقى سايس الحصان ومعلمه
فجأة بقى مرفوس
لما تلاقى القتل بأسم الجهاد والدين
وطالت كحرب بسوس
لما تلاقى الزهور ونبت الأمل محشوش
ونبت الشيطان والدمار فى ارض الوطن مغروس
لما تلاقى علم الظلام بيرفرف فوق فى العالى
وعلم السلام والنور مش لاقى هوا ومنكوس
لما تلاقى سر القبور والموتى 
والراحلين فى امان بعد الوفاة منبوش
لما تتغير لغة الجمال
وينتقدوك يقولوا عليك مهروش
عملت حساب الزمن
لما تضيع بسمه بلادى 
ويغيب صبحها ابو وش بشوش
لما تلاقى ابنك بيكره بلادة الجميلة
وبالسهل يغلط فى امم وجيوش
حتى كلام الست وحليم
راح مع تيجا وحلق حوش
لما تلاقى جارك فى نص الليل
بيخبط عليك بشاكوش
وبدل الوفا والحب اصبح جارك هاموش
لما تلاقى الزعل بين الصحاب والاهل
بيتحل بالنار والسنج والموس
والدين والشرع وصحيح البخارى
عمرك يا ميزو يا عطسة شيخ متوصلوش
وفى العلم اتكلم الجاهل محاضرات ودروس
وبدأ ينخر فى دينك زى البعوض والسوس
فر قوام من جهلة ولازم متسمعلوش
لما تلاقى آلآت من البشر خربانه بقلها تروس
لما تلاقى السفالة تذكار ومش عيب
على الحجر منقوش
خلاص ملامحك يا بلدى 
والآصالة يا مصر بقت بقايا رتوش
واشترى فيكى وباع
ابو جيوب الفساد وريش الغراب منفوش
والقوى دايما فى الفقير عمال على بطال بيلوش
والكل سامع بيتفرج عامل حزين مطروش
غابة يا دنيا الديابة وكتير 
من البشر دى وحوش
يا كون اتخلق وحكم فيك القدير والعدل
وغير قدرك يا ابن ادم فى دنيتك ما تحوش
وابن الحلال والشهم فى الحالة دى 
غير ربنا ورحمته ملهوش
بقلم مراد مصطفى مراد