جارى التحميل
استخدم زر ESC أو رجوع للعودة
هات عنيك
أنسى فيهم دمع روحى
واستخبى بين شعابها
نجم بحر والشقايق
والوان بتسحر ف الخلايق
أنسى ليل ما اعرفشى يطوى
ساعة واحدة من حنينى
أو آهة حارة من شجونى
كنت تايهة زى موجة
فى بحر واسع
كنت خايفة زى طفلة
لما شافت جوا نومها
طفوا نورها
اللى كان بيجيلها ناصع
أنسى يوم ما حلمت بيك
وانتظرتك
واترسمت فى قلب قلبى
وارتشفتك
واتلقيت الشط ببعد
والنجوم عمالة تنزف من أنينى
والطيور ترانيمها تبكى
فوق غصونى
وانت ساكن فى انتصارك
إنى كنت صادقة ليك
وان حبى مش كلام
ليه بتفسد كل لحظة
هدلت فيها زى بنية حمام
إنت موج من فوقه موج
شمعتى ضلت طريقها
فى العروج
أنسى شوق بركان بيغلى
وانت ميعت اللقاء
شوفت فيك أوجاع كتيرة
وانتحار ما لهوش عزاء
هات عنيك خرجنى منها
وانسى انى ف يوم سكنت
فيها لحظة واحدة
كات أمانى بقلب حب
مش مناهدة
كنت صادقة وانت خاين
كنت هايمة وانت فاكر
إنى لعبة ف الجناين
كات عنيك رعشة وجودى
ف الحياة
إنت حطمت اللى ساكن جوا منى
إنت حطمت النجاة
_______________
،،،ليه بتفسد كل لحظة ،،،
الشاعرة/... عبيـــــر الجنـــــــدي...
...(همسات استثنائيه).
