مجله كل الخواطر / هعيش وحدى بقلم الشاعر/ تامر النقـــــيب

وإيـه يعنى هعيش وحدى
وأعيش الدنيا باحزانها
وأفصلها على قدى
ما أنا أصلا فى يوم ماجيت
نسيت إسمى 
نسيت تقاطيعى وملامحى
وكل الناس تقول إنى 
ملياش بخت
وواد فقرى 
هيحصل إيه
ما انا واخد على الوحده
وهعيش وحدى 
فرشت كل أحزانى 
وقعدت لوحدى وسطيها
لقيت الدمعه تواسينى 
ومش عارف أداريها
وحتى الآلآمى وجروحى
خدت منى كمان روحى
وحزنى قال مهيش ناقصاك
لقيت أوجاعى تكرهنى 
ففضلت أنى أعيش محروم
وإيه يعنى مشفش النوم
ولما أصحى أكون مهموم
وشايل راسى على كفى 
انا حاسس بإن الموت
قريب منى 
وحاسس كل أشعارى بترفضنى
وقلمى اللى كان صاحبى 
بقى التانى مخاصمنى 
لو اكتب بس كلمه حب
الاقى الرد ليه صدى
طب أعمل إيه 
انا تعبان 
وأصلا ف الاساس غلبان
وياما دوقت م الحرمان
وأقول اهى محنه وتعدى
لكن برضو مليش انا بخت
تملى الدمع على خدى
هعيش وحدى 
واحاول الملم الأوجاع
وكلفت نفسى فى حكايه
وادور عمرى مني ضاع
مابين حدوته وروايه
وناس عايشه وشوشها قناع
تلاقى الضحكه قدامك
بضهرك يقلبو الأوضاع
معادن أصلها مصدى 
غريبه يادنيا كدابه
وغداره وقلابه
بتلعب بينا زى الزهر
ملك مره على كتابه
لكن سايب خلاص لعبك
وهكسب نفسى وهعدى 
عشان أصلا منيش عاوزك
وهفضل عمرى ده لوحدى