مقصودة
أنا ايه واطلع مين
امممم سؤال جميل
انا اللي مليش ف الهاشتاج
اللى وصفه رخم وسئيل
#مقصودة
انا حقانى من صغرى
واواجه الغول في نن العين
لا انا بهرب
ولا اتخبي
ولا اتدارى
ف بوست طويل
اولها اقول عن ،،،،،
وجنبها المود يدى لإيه
مثلا اقول فلان باعنى
وسهرنى ولوعنى
وفرح بنزول دمعى
، ولا اقول عن ناس خاينة
ومكانتش ع قلبى صاينة
و نفسي منهم اوي شايلة
يعني من الأول والاخر
رافضة للوضع الساخر
لكن مش ببوست #مقصودة
وكام كلمة مع صورة
وابات بحزنى مكسورة
انا قررت إنى اثور
واقول للي يبيعنى غور
حافظت عليكم ايام وشهور
فمش هبكيكم جوة سطور
نويت أكون ما بينكم ألف
باختصار اكون مختلف
وهغير كل المتعارف
وهعمل برضه #مقصودة
ع الفيس .. لكن عارف
هتبقى مليانة زخارف
بناس حلوة في حياتى
وهضيفهم عندى ف تاجاتى
تاج للاخ الجدع جنبى
وتاج لصديقة ما تعلمني
مشافوش صورة يوم منى
لكن بحسهم من دمي
و#تاج لصدفة مش ف الحسبان
جمعتنى بحد عرفته زمان
وكان بينا اللقا مقطوع
مش عشان الكلام ممنوع
لكن عشان الأيام بعدتنا
والصدفة هي اللي جمعتنا
و علي اتصال .. اتعاهدنا
وكمان #مقصودة لكن فارقة
لارواح ناس لي مفارقة
لكنه مش عتاب او لوم
و كإنى داخلة ع عركة
دي دعوة من قلبي وبحرقة
ينجدهم ربي من الغرقة
ما حكم الدنيا بتصفى
وبراحها يضيق في الخنقة
وربي يعافى ويشفى
المريض واللي في الزنقة
واترحم علي المتوفى
وتجمعنى بيهم سما زرقا
أخر #مقصودة دى شهادة
هنزلها ع غير العادة
اسامي ناس يستاهلوا
تقدير لنجاحاتهم وبزيادة
ما انا اللي عيشت جوة خطوط
عشان ارسملهم بورتريه سعادة
عشان يوم ما يتقفل عليا تابوت
هتمنى دعوة في عبادة
غريبة انا في الملكوت
وواخدة فيها انا ،، إجادة
