(مجلة كل الخواطر) كان نفسي أضحك _ بقلم الشاعر الراقي/ خالد العطار

كان نفسى أضحك قبل ما أموت
كان نفسى يبقالى جواكِ صوت
قلت يمكن يتولد جواي حب 
جواكِ انتى مش راح يموت
بكيت كتير
يمكن أسمع لحن البكا
حتى قلمى ما راح يشتكى
ودمعتى شلال
وصوتى مكتوب عليه السكوت
كسرت الشعاع وقطعت الوتر
وشوقى ليكى شوق الصغير للمطر
هنت يا مصر عليكِ 
وانا اللى حيلتك 
وانا من حشاكِ 
وانا ابن قلبك اللى انفطر
ما عدتيش تقولى اسم الله عليك
ما عدتيش تقولى ربنا يحميك
ما عدتيش بتحمى ولادك من خطر
خلاص يا أمى 
عفيتك من حمايتى
وغنيتك عن ربايتى 
يكفينى شرف يا أمى
انى أروى ترابك بدمى اللى انهدر
والله يا أمًا ما كانت الحكاية كورة 
كل الحكاية انى شفتك بالحمل مقهورة 
وان الدمعة من عنيكى فى القلب مأسورة
سبتك يا أمى 
وكل عشمى ان ربنا يحميكِ
كان نفسى يعطينى ألف عمر
وبعمرى أفديكِ
اترحمى يا أمى على ولادك بكل مكان 
عسكرى شال مخلته 
وقال دى بلدى أمان 
طالب يوم فرحته 
برصاصة غدر على الطريق متهان
وانا يا أمًا رحت أفرحلى ساعة
اعذرينى يا مصر دا أنا انسان
كان نفسى أضحك قبل ما اموت 
وبالشهادة يا أمًا انا فرحان
خالد العطار