جارى التحميل
استخدم زر ESC أو رجوع للعودة
== زهــــقنا == عاميّة
==================
زهقنا زهقنا من التــكرار
دول خلوا عيشيتنا بتغلى ف نار
همّه همّه نفس الوجوه
اللّى مسمّيين نفسهم أحرار
انتخابات بات والتعلب فات
وف ديله سبع أصوات
وقاعدين لنا من سنوات
وصوتنا راح والظلم ما مات
والتغيير ملفوف ف حرير
وماتلقيهوش فى الأجزخانات
أنا راح اصوت ميّه الميّه
بحبة فول ويّا الطعميه
وح ارفع صوتي لأغلى عيديه
واللى يعلّي ح اقول له هات
والتعلب فات ف ديله سبع أصوات
انتخابات إيه يا أفندينا
دى لعبه وسرّها ف ايدينا
للّي بيدفع وبيدّينا
واللي يحاول يجي وسطينا
حنفرمه إحنا ف ست ساعات
إنتخابات بات والتعلب فات
أنتخابات حصانه وبالملايين
وديتوا زمان فلوسنا فين ¿
قروض ونهب ومش شايفين
غير اللّي بيدفع بالآلافات
انتخابات والتعلب فات
إنتخابات وخمس سنوات
ناكل قشطه وبلح امهات
ونفصل لينا كمان قوانين
من دستور عمره ما مات
ونجري ونلعب فى الوزارات
واللّي يجيلنا نقوله : هات
إنتخابات والتعلب فات
يابن الدايرة تعالى وقول
صوتك ليه دايماً مقفول
واللّي ادِّيته لقيته مقتول
وصوتك راح وكأنّه مافات
وليه ماعجبش كيف البهوات
إنتخابات والتعلب فات
وف ديله سبع أصوات
..............................
الشاعر / رفعت ابو العلا
