(مجلة كل الخواطر) أبو عبد الودود _ للشاعر المبدع / تامر النقيب

أبو عبدالودود
بقلم تامر النقيب
********************
مالك يا ولدى يا عبد الودود
بتعيب على زمنك ياولدى 
إياكش فاكر الدنيا باقيه
بالمناصب 
ولا كرسى ولا فاكرها نقود
تعبان ياولدى م الزمن
ولا بتنعى ع الألم 
اللى بجوانا إنقسم
ولا بتنعى على اللى خان
وخلا حالنا بقى عدم
ده أنا من زمان الحمل مال
عشت ببلدى كتير رحال
وكنت أدور ع اللقمه
ويقولو عنى ده وِلد حلال
خليك يا ولدى كيف أبوك
قوم وإتفرد نشف دموعك ع الخدود
خليك جبل كسر حصارك م القيود
واسمع يا ولدى يا عبد الودود
كان زمان خال كان ولد
وإسمه زيك عبد الودود
حارب كلاب مالهاش عدد
وبروحه كان حامى الحدود
كان بيهتف بإسم مصر 
الله أكبر ع اليهود
ويزلزل الدنيا لما كان 
ع الأرض يمشى
والأرض من تحته ياولدى 
تزعق تقوله يابطل
تطرح ورود
مالك يا ولدى خليك قوى 
زعلان على خواتك فى سينا
ولا اللى ماتو بالشوارع والميدان
ولا اللى ماتو ع الحدود
ضحكو عليك يا عبد الودود
قالولك إحمى ع الحدود
وسلسلوك
وكتفوك
وقطعو لسانك والأوامر 
يا عسكرى إلزم سكوت
ضحكو عليك قالو بطل 
وأنت كما رِمي النياق زى القعود
ماتفوق بقى يا عبد الودود
شوفت يا ولدى التســــــــــريبات
شفت الخيابه والصدمــــــــات
شوفت اللى مدو لمصر أيديهم 
قالو عليهم إنهم حبه بنات
شوفت الخيابه والعفن
شوفت اللى بيصيب الوطن
زى ماضحكو عليك صدقتهم
خلوك يا ولدى ليه حقود
مالك ياولدى 
بالله ياولدى خفف عليك
وكفكف الدمع بعنيك
وإرمى سلاحهم من إيديك
رجع ميدانك والصمود
عارف يا ولدى 
كنا زمان بندفى بعض
كان الأمان جوه البيوت
وف الشوارع
والحوارى 
والغيطان
ولاحد فينا باع فى حد
كنا نفرش ع البيبان
ولايبقى جارك يوم جعان
كنا بنام بدون غطا 
وسط الزراعه والغيطان
كنا نحكى وإحنا 
فى حجر المصاطب
كنا نذكر اللى حاضر واللى غايب
بالخير ياولدى 
ولاكنا نعرف يعنى إيه شكل المكاتب
كنا ناخد حته فضه
بكل عيد
كنا نلبس مره عادى 
لو فى عيد مجاش جديد
بس كنا تملى نفرح
والكل كان دايما سعيد
كان اللى يزعل من أخوه
يجى يعاتب 
ولاعمرنا عرفنا كلمه 
الندل الحسود
قوم بس يابنى 
عارف يا ولدى حُرقتك
حاسس ياولدى قهرتك
متوهش تانى بسكتك
ماكفايه دول فَرقو السنين
وضيعو منا عقود
أسمع يا ولدى يا عبد الودود
إنهض كده وخليك شديد
خليك قوى وعزمك حديد
لو حتى يوم موتنا بكرامه
تعيش كرامتك للوليد
بس عاوز والله اقولك
عندى فيك يابنى رجاء
وأعتـــبره أمــــــر
إرفع ياولدى برضو راسك
أنت مصرى يا ولدى حر
هما بيخونو ياولدى 
والله عادى ده من سنين
فاكرينا هنبوس الأيادى 
واحنا عايشين مغصوبين
دول يبقو حلمو إننا
لازم نعلى فى البلد
يطلع دهب من طين
بس إحنــــا ننوي
وأهو كله على فيض الكربم
سيبهم يا ولدى ينهبو
ويفرقو ويقسمو 
إياكشى بس يشبعو
واللى من دم الغلابه يطفحوه
أهو بكره بيه يتعذبو
وشراب بطونهم من حميم ولا ينفعو
أبدئ يا ولدى بحب تدى
لو كلمه حتى تقولها ضدى 
بلدك حبيبتك محتاجلك
وحتى قالتلى ده سندى 
ومحتاجلكم يا ولادى 
وأنا والله بولادى هعود
تــــامر النقيب ,,,