( مجلة كل الخواطر) سامحيني / بقلم الشاعر أ / خالد العطار

سامحينى
زمان كنت بفرح لما بتلمحينى
وأنول الرضا بإبتسامة
أرقص زى طفل هايم
ما بخفش من كلمة ملامة
بس كنت خايف يوم تبعدى وتجرحينى
كنت خايف اكون رسمة فى صفحة ورق
يعشش جواها التراب وتنسينى
ومن حياتك من غير حساب تمحينى
ما أنا اللى عاشق
ما أنا اللى سهم هواكى فى قلبى راشق
ما أنا اللى عارف إنك إنتى سبب حنينى
آآآآه ...خفت تبعدى فبعدت أنا
قلت خلينى تايه بوجع الشوق
يوم ولا شهر ولا حتى كام سنة
ما كنتش عارف إنى ببعدى هادبحك
كنت فاكر إنى لما أخرج من تحت تراب الوجع
هلاقى فى عينيكى شمسى وألمحك
أتارينى رجعت وشمسى غابت ورا ليلة شتا
بستانى تحت ركام التلج صامت
وعيون الخلق جوا أحضان الدفا بالحب نامت
وأريج الورد من طول البعد أصبح رماد
وعيونى بشوقها متكحلة بلون السواد
النهاردة بس حسيت بغلطتى بحق الوروود
زرعت شوقى بعيون وردتى ..وسافرت
وقلت لابد للمسافر لقلب حبيبه يعود
ولما جيت أقطف وردتى من بين جبال التلج
لقيتك يا وردتى بشوك شوقك بتجرحينى
جرحنى شوكك ....جرحنى شوقك.....بكيت
بكيت....بكيت؛؛؛؛؛
سمع قلبك أنين بكايا
رق النسيم ...
وجذوة الشوق دوبت بينا الجليد
و ندا الفجر داعب هوايا
واتبسمت وردتى.... وقالت :--
حبك يا خالد .......فى قلبى ما زال وليد
من حياها دارت وجهها
ولمحت بعينها دمعة
هوت بالقلب بلورة لامعة ..
مال قلبى ...وهويت
دنا عشان خاطرك
شلت معايا بقلبى الوجع وجيت
ما أنا عارف انك انتى اللى هتريحينى
فسامحينى
الشاعر
خالد العطار