(مجله كل الخواطر ) نفس من دخان السيجارة - بقلم القيصر الشاعر / سامح شبل

قصيدة .. نفس من دخان السيجارة
عميق غميق
واحبسه حبسة الثاير فى معتقل
ولسه مبادئه ماضلوش الطريق
خلى النفس يحكى
........................................................
نفس من دخان السيجارة
عميق غميق
واحبسه حبسة الثاير فى معتقل
ولسه مبادئه ماضلوش الطريق
خلى النفس يحكى
ويشاهد الاحلام
ويشاهد الاحزان
يجالس الشهدا اللى فى الشرايين
وسيبه يرمح بالبطئ
وايه للصديق غير الصديق
وايه للرفيق غير الرفيق
نفس عميق غميق
بشوف دنيتك ف دخان السيجارة
مينا ف مدينة
ليها ميت مليون منارة
فيبدّلوا الطين بالحجارة
فجأة تنطفى
والمدينة تضيق
نفس عميق
واطلق الدخان وشاهد
الخطوط والخيوط
شوف بيوت العنكبوت
بأقل حبة هوا ينزال
وكام فريسة عليه تموت
دقق ف ضعفه تلاقيله حياة
ومملكة وملكوت
حبة هوا فى نفس جديد
تطلع مدينة من حديد
كل اللى فيها حديد
قيود حديد
بيبان حديد
بيوت حديد
قلوب حديد
بس برضه النور حديد
عجيبة موتة ولد مقتول سعيد
وكل ذكرى ليوم مماته بتبقى عيد
تتملى الميادين
ويروح يزوره كام شهيد
اخر نفس من السيجارة
وغمض عينيك وروح
هتلاقى روح
جواك تدلك
انت مآمنها وهيه تآمنلك
لاقيك وصدق نفسك
هد الحواجز والحجارة
رجّـع النورللمنارة
ساوى كل حاجة بالصفر المكعب
حان الان موعد اعدام السيجارة

................................
sameh shebl