جارى التحميل
استخدم زر ESC أو رجوع للعودة
قصيدة أحلام وطن .... بقلم الشاعر أبو يوسف محمد
مصر الحبيبة
والحبيبة للحبيب متشوقة
حطم جدار الخوف بقى
وابنى بإيديك أحلام عمرنا
خلينا نهزم جرحنا
نبنى بلدنا ونبدأ فرحنا
خلى جواك أحلام وطن
متحققة
اصرخ بقى
إوعى تندم ع اللى راح
إوعى تفضل فى الجراح
إوعى قلبك يوم يحس
بالضياع
إحنا أكبر م الصراع
أحلامنا بحر سلام ومركب
وإيدين ولادنا ليك شراع
إوعى تندم ع اللى ضاع
إوعى تفضل عند نقطة
صان بلادك ولا باع
عيش بس أيامك
وطير بأحلامك
فوق سحاب الوجع
وانسى الشقى
حطم جدار الخوف بقى
كل الحروف جواها خوف
تبكى وتشكى م الظروف
تشكى وتبكى وعنيها مرغرغة
مغربة ومشرقة
لكن عيونها مصدقة
حطم جدار الخوف بقى
إياك تحس إنك غريب
جوة الوشوش من غير لقا
خليك بشوش
إياك تحس إن الدموع
جوة العيون متشوقة
عيش فرح عمرك
جوة قدرك
ولا حزنك مرة قال
إن الأمانى ضيقة
حطم جدار الخوف بقى
ابنى بإيديك يا ولد
حاجات حلوة للبلد
حاجات تعيش طول السنين
تحكى لكل الدنيا بعدك
إنت مين
اصرخ بقى
وفك أغلال جواك
لساها مطوقة
حطم جدار الخوف بقى
إياك تحس بالشجن
إياك تطاطى
ولا تمد إيديك وتطلب تمن
عافر وعاند ف الزمن
وامسح دموع خد الوطن
إياك تحس المغربية إنك ضحية
وإن كل الدنيا ليك
أحلام كتير متخنقة
حطم جدار الخوف بقى
إيه هيحصل لما تصرخ
فى الميدان
وتقول لكل الدنيا ديا
إنك جعان
وإنك حاسس بالضياع
من زمان
هيعلقوك فى المشنقة
فووووووووووووووق بقى
دا مهما كان
موت حر مش جبان
صورة شهيد طول الزمان
جوة القلوب متعلقة
حطم جدار الخوف بقى
إوعى تفضل يوم هناك
إوعى الناس الطيبين تنساك
لسه مصر مستنياك
متكحلة ومتزوقة
حطم جدار الخوف بقى
وابنى بإيديك أحلام عمرنا
خلينا نهزم جرحنا
نبنى بلدنا ونبدأ فرحنا
خلى جواك أحلام وطن
متحققة
اصرخ بقى
خلى جواك نسمة أمل
وعيش دنياك
وحس يوم إنك بطل
إياك تحس جواك بالوهن
خلى جواك أحلام وطن
خلى جواك أحلام وطن
