( شايف بشر ما بنّا !! )
بقلم : حازم سعيد ( أبو عبدالله )
شايف بشر ما بنّا ماتو بالملايين
ياريت ماتوا وادّفنوا زي البني أدمين
ماتو بموت احساسهم بباقي المصريين
يشوف قدامه الجثة وقبل مايزعل يسأل
الميت يبقى تبعنا ولا الناس التانيين
لومطلعش تبعنا يبقى ف ستين داهيه
وياريت كان منه اتنين
وفي ناس بتشوف الجثة تدعي بقلب حزين
نستاهل قطع لسانّا لو نسأل تبع مين
ربنا يهدي ويرحم كل المصريين
بلدنا دي مركب واحده كلنا فيها عايشين
لو غرق واحد منّا راح تغرق بالباقيين
متقولش نضحي بحبّه ده كلنا مصريين
طب لمّا تقف مركبنا ولمّا تضيع وحدتنا ده كله لصالح مين ؟
رد عليّا واحد بصوته العالي يقولّي
بردو بُكره احلى حتى لو مات ملايين !!
ياااااااااااااا
يا قلوب الكُره سدّها
والغل نشّف دمها
يا قلوب بتلعن اهلها
وبيجري فيها صديد وطين
حالتكو خلاص عرفتها
حالة مرض على أرضها
تشخيصها بس في كلمتين
بشر بتكره نفسها
مستنّي منها تحب ميـن
بقلم : حازم سعيد ( أبو عبدالله )
