حال الشعراء
ودا حال الشعراء فيكى شايلين فى قُلوبهم غناويكى
رحالة وزادهم شمسك وِكسوتهم ليل يطول فيكى
يتغنوا بكلام معسول ما يطول
إلا والدمع يجرى أول ما العين تيجى عليكى
حالك مال كده ليه هوة إحنا ملناش دلال عليكى
دا إحنا إلى غنينا فى سواد كحل عنيكى
وشربنا شهد المرار من ورود خدك لما الغيلان عاثوا فيكى
ولو مال الزمان بينا عمر الزمان ما يميل بيكى
ولادك علموا الصبر معنى الإحتمال
جدودهم عشقوا الفن وحب الخيال
من كبير فرعون حتى صغير العيال
كتب الصبر على جبينهم
قاعد أنا منيش رحال
محمد حسانين
