الحل العربي
ـــــــــــ

بِاسْم الإِرَادة الشَّعبيَّه
باسم تحدِّي العُبودِيَّه
تُعْلن أمِّتْنا العربيَّه
وِحْدِتْنا باتِت حتميَّه

باسم السَّما باسم الضَّمير
باسم ارتِبَطْنا في المَصير
باسم الِّي كائِن والِّي كان
باسم الزمان باسم المكان
باسم الأُصُول حُرَّه أبيَّه
وحْدِتنا باتِتْ حتميَّه

باسم الشَّرف باسم الكَرامه
باسم المَرُوءَه والشَّهامه
باسم الرُّجوله والعَزيمه
وفَخْر عزِّتنا القديمه
لجل إراده حُرَّه قويَّه
وحْدتنا باتِتْ حتْمِيَّه

باسم الذُّل باسم الهَوَان
وبحق مَجد هُنَّا وهان
باسم الأرض باسم العِرض
وبحق كل عربي اتهان
باسم الغِيرَه باسم الحَمِيَّه
وحْدِتنا باتِتْ حَتْمِيَّه

باسم الشَّريعه السَّماويَّه
باسم جَميع الأنْبِيَّه
باسم النُّصوص الدوليَّه
القدس مدينه عربيََّه
وعشان ما ترجع عربيَّه
وحْدِتنا باتِتْ حَتْمِيَّه

وبحق بغداد والجريمه
وخِزْيْ مأْسَتْنا الأَلِيمه
باسم الظَّلام والإِحْتِيَال
وكل أهْوال الاحْتلال
باسم الشُّعوب عايشه ضَحيَّه
وحْدِتنا باتِتْ حَتْمِيَّه

باسم الصُّومال باسم السُّودان
وبحق لبنان والجولان
باسم الزور باسم البُهْتان
ونيران الفتنه في كل مكان
باسم المآسي العربيَّه
وحْدِتنا باتِتْ حَتْمِيَّه

باسم الوحده بين الأقْوِيَّه
والِّي حياتهم خُضْرَه وميَّه
من غير شئ في الكون يِجْمَعْهُم
إلاَّ مَصالح إعتِدَائيَّه
واحنا جامِعنا مَصير وقضيَّه
وحْدِتنا باتِتْ حَتْمِيَّه

كنَّا إيه قبْل الأمَم
وبَقينا إيه بين الأمَم
رايِتْنا ليه مش مَرفوعه
كلْمتْنا ليه مش مَسموعه
لَجل مكان بين البشريه
وحدتنا باتت حتميه

دا مشكلتنا فينا احنا
كِيد العدُو منها برئ
احنا عقولنا أصل المِحْنَه
عقولنا لَزِمْها خارْطِة طريق
لجل ما نفهم إيه حريه
وحدتنا باتت حتميه

لِحَدْ إمتي مِسْتَنِّيْين
وِنْرُوح شمال ونروح يمين
والكل يجمع فينا ويطرح
واحنا ايدينا متكتفين
عشان ما تبقى الكلمه قويه
وحْدِتنا باتِتْ حَتْمِيَّه

والوحده مش كلام وخلاص
ولا دموع ولا أنين
الوحده دي فعل بِإخلاص
ينصف شعوبنا المحتارين
وشعوبنا في الحيره عَتِيَّه
وحْدِتنا باتِتْ حَتْمِيَّه

وحدتْنا دي إرادةْ شعوب
حلم وأمل مالي القلوب
وحدتْنا دي وحدةْ مصير
جامعه الصغير والكبير
واحنا رفعناها مدوِّيه
وحْدِتنا باتِتْ حَتْمِيَّه
،،،،،،،،،،،،،،،،،،،،،،

محمدامام
ـــــــــــــــ

إ