وحشتيني
*********
وحشتيني ياأغلي
وأعز الناس
وحشتيني ياتبر
ياألماس
وحشتيني ياأمي
وحشتيني
بأشوفك كل يوم فى منامي
بأشوفك في كل أحلامي
بأشوفك واقفه قدامي
بتبتسمي
وعليَّ بتسمي
وإيدك علي راسي ترقيني
والتانيه عليَّ تَطَبطب
علي صدري تهَديني
علي كتفي تقويني
وتفضلي طول الليل
جنبي سهرانه تتابعيني
ما تغفلي عني وماتنامي
لا في اليقظه ولا ف منامي
تصلي الليل وتدعى لى
ربي بحفظه ينجيني
ومن شرور الناس يحميني
ومهما كان ألمك
تخبيه عني ماتعرفينى
لحد الصبح تصحيني
وتدعيلي وأنا خارجه
يفتح لي البيبان السَادَه
ويكفيني . شر عين الناس
ودايماً أكون عاليه
ومايوم أنظلم وأنداس
وأخرج وإنتِ تستنيني
لحد ماأرجع . تطمني
وفي حضنك تضميني
ومهما عني تداري
أنا بيكي إحساسي عالي
باأحس بخوفك وقلقك عليا
باأحس بألمك وإنت ضمه إيديا
ونبع حنان من شهدك
يطمني علي الدنيا إللي أنا فيها
والوِحشَه فيها كنتِ عني تخبيها
وحشتيني
وحشتيني ياأمي
وحشتيني ياأعز الناس
وحشتيني يارحمه ليَّ في الدنيا
دا لما الدنيا تضيق بيا
أروح علي بابك أستني
تفتحي لي تردي عليا
أشتكي همي وظلم الناس ليا
ألاقي في حضنك الحنيه
أرتمي بصدرك وأنام
لأحصد منه الحنان
وأحس معاك الأمان
ياأمي أنا حزينه وزعلانه
من يوم ما سبتيني
مش لاقيه إيدك
في الليل تغطيبي
ومن البرد تحميني
ولما أمرض تداويني
وتدعي الرب يشفيني
وتقول .
يارب شيل عنها وإديني
دا هيَّ . روحي ونور عيني
وحشتيني ياأمي
وحشتيني
هاتي إيدك
أنا حاساها
أنا فاكراها
كانت شافيه
وم الحنان دافيه
وعمر مايوم كانت جارحه
وهمساتك أنا سامعاها
كانت دايماً بتدعيلي
ولما كنت أغضب
ماكنتِ تنامي إلا أما تصالحيني
ياأمي الدنيا عليَّ قاسيه
والناس تايهة وللأصل ناسيه
وبتدوس علينا بدون رحمه
ماهي الحياه بقت زحمه
فيها إللي يقتل أخوه
وإللي يدوس علي أمه وأبوه
والأصحاب .
والأصحاب بقت خاينه
والأحباب كمان هاينه
ومعالمها ماهي باينه
ياأمي محتاجاكي
خديني وياكي
ليه .... مانش واحشاكي ؟
ياأمي وحشتيني
وحشتيني ياأمي
وحشتيني ياأعز الناس
صفاء عبد ربه
