جارى التحميل
استخدم زر ESC أو رجوع للعودة
عوّاد
.....................................................
على الشط كان عواد بيغنى
يهمس لعصفور السما ولنجم كان متحنى
يحكى عواد للموج أخباره
يرد الموج يبوح لعواد بأسراره
يغنى النسيم بالغُنا مواله
ع الشط كان عواد عايش فى أحلامه
يرسم ع الموج حكاويه بأوهامه
يخاوى النجوم يغزل منها أتوابه
يتوه عواد ويدوب فى أتوابه
يحلم عواد ببنت المعزعروسة بحور
ينسج حكاوى م الغنا ويدور يقول
أنا اللى عمري استوى وأيدى على خدى
نفسي ألاقى نفسي وأزرع أنا أرضى
نفسي يا بنت المعز فى مسرح عرايس دُمى
ويكون بطلهم أنا والمتفرجين العُمي
عوّاد صبح غاير على عرضه
ولو يعود الزمن مايبيع فى يوم أرضه
عواد حالف براسه وراس أبوه
ياخود بتار الحلم وتار ياسين أخوه
وبهية تمسح دموعها وتدعى على اللى خانوه
ويزرع عواد فى أرضه ويرجّع اللى .. باعوه
...............................................................
كلمات / أيمن صبري زنون . صنصفط . منوف . مصر .
