توب الحزن
..........
فستانك الأبيض
قوليلي ..
غيرتي لونه ليه
مش برضه
ليلة فرحنا ..
تبقى النهاردة
ولا إيه
وإزاي بتوب
الحزن بتجيني
بدموعك ..
وبتنسي أجمل
ليلة .. عمر ..
بنبتديه
..........
خليني أدور
عن سبب ..
أحاول أعرف ..
السبب
لكن ماأنا
فعلا حاولت
آسف .. آديني
أهه إفتكرت ..
ماأنا أصلى بين
نسياني تهت
وباعني إحساسي
لدموعي ..
وياما باع
من يوم ما
واحد منا ضاع ..
والتاني عايش
عمره كله
دموع عليه
..........
من قلبي
من أحلامي
ببعتلك سلام ..
من قلبي
برضه .. بعتذر ..
إني إفتكرتك
لسة جنبي ..
بكلمك ..
ولسة بياخدنا
الكلام
ياعايشة لسة
بضمها ..
رغم الرحيل
الدمع نار ..
والحزن نار ..
والليل طويل
..........
أنا نفسي أفتح
عيني ألقى
دا كله حلم ..
أنا نفسي أرتاح
م الدموع ..
لولحظتين
أوصل معاكى
لحلم أبعد
من قدرنا ..
ياعروسة ليه
الفرح مش
بايت في دارنا ..
ليه بيجي لحظة ..
ويبتعد ..
ويغيب سنين
طب وإحنا مين ..
مالناش
في بكره غير
أسى ..
وألم وجرح ..
وشوق حزين
فستانك الأبيض
قوليلي ..
غيرتي لونه ليه
مش برضه
ليلة فرحنا ..
تبقى النهارده ..
ولا إيه
..........
أحيانا من الصدمة ..بيتهيألي إنك لسة موجودة ..بشوفك وبحسك ..وبكلمك..صدمة رحيلك مازلت بعاني منها رغم مرور السنين ..وبتخيل أحيانا إننا في ليلة فرحنا ..بس دايما بشوفك بفستان ..لونه مش أبيض
محمدعبدالرحيم