إطلاله مُره
( فى شوارع المدينه )
……………………………
جيت للمدينه
وأنا جوايا كتير أحلام
لكن ياخساره
تاهت منى فى الزحام
كُنت بمشى فى بلدى
وأنا مابين الناس معروف
لكن فى شوارع المدينه
منى ياما ألوف وألوف
فى شوراعك يامدينه
شوفت العجب
شوفت إللى بيتاجر فى الدهب
وإللى بيتاجر فى الألماظ
وإللى بيتاجر فى الخُرده
وإللى بيتاجر بالألفاظ
وشوفت رغيف العيش ع الأرض
والجزمه فى فاترينه إزاز
وشوفت واحد عنوانه باين من أولو
وليل ونهار مقضيها سُكر وعربده
وسايب مراته وأولاده يتسولو
وشوفت واحد متجوز أربع نسوان
وكل واحده حُره فى تصريف أمرها
وهو قاعد ع القهوه ولا السلطان
وإللى تعمله لقمه حلوه يروح لها
وشوفت ناس مظلومه ومستحمله
ومش عاجبها حال البلد
لكنها عايزه الإستقرار
وشوفت ناس عايزه الفوضى ومكمله
ومش هممها حال البلد
علشان بتقبض بالدولار
الكل بيجرى على الفلوس
وكل همه هياخد كاااام
ولاهمه قطع الرؤوس
ولاهمه حكم الإعدام
والناس علشان الفلوس
بقت عايشه بمبداء
إحينى النهارده وموتنى بكره
وأنا مش عارف أيه بيجرا ؟؟؟؟
حد يقولى أيه بيجرا ؟؟؟؟
إيدى إتشلت والقلم وقع منها
وأحلامى خلاص دبلت وبهتت لونها
بقا بعد كل إللى شوفته هحلم تانى
أكون فنان كبير ومؤلف أغانى
دانا لو وقفت فوق قمة الهرم
وقولت ياليل ياعين
لا فى حد هيسمعنى
ولا حد هيسأل ده يطلع مين
الناس علشان الفلوس بتعد الثوانى
وألف رحمه ونور ع المبادئ
وألف رحمه ونور ع الأمانى
وأنا ساكن فين . . أنا معرفش
لو حد عارفنى يجى يكتبلى
على دراعى إسمى وعنوانى
…………………………
إطلاله مُره
( فى شوارع المدينه )
بقلم الشاعر يوسف الحمله
22/2/2015
