..... توهت مني ....
ياه ياه يا الف اه
لما بقعد ويَّا نفسي
واحكي يعني جوه مني
بلقى كل العيشة صعبة
وقلبي يهرب غصب عني
واتخطف في دقيقة وارجع
مرة تانية اشوفني عيل
جوه ضلمة بطن امي
وحضنها المليان حنان
اغزل الاحلام بصوتها
لحن طارح بالامان
اعزفه وحدي واغني
ده ببساطة لان يومها
ماكنش لسه الخوف سكنى
أصل عمري ما خوفت خالص
م الحياة والعيشة يعني
واما جيت الدنيا سارح
توهتني ف بحر جارح
ويا حبة من الملامح
كات غريبة بجد عني
شوفت عالم طبعه قاسي
وناس غريبة يقولوا ناسي
اللي فرحان بيا خالص
واللي زعلان من وجودي
بس لولا العيب ياكلني
خوفت يومها بجد ياما
واتمليت بسنين ندامة
والف حيرة وهم صابني
نسى عمري الابتسامة
وجوه سجن الحزن سابني
اشكي حال الدنيا ولا
ابكي ع العمر اللي ولى
ولا الوم ف زمان ملخبط
خلى كل الناس علاولة
مش بايدى غصب عنى
التقيتني توهت مني
