انا الوشم المختوم
بقلم محمد البلاط
انا الوشم المختوم
من الله على جدار قلبك
فاكر انك هتنسانى
فاكر هتسبنى فى مكانى
فاكر راح تنسى ماضى وراح
وتمسح كل كيانى
فاكر انك هتنسانى
انا وياك وفى دمك
ووشم فى جدار قلبك
انا الماضى انا الحاضر
انا اللى لو بعيد عنك
تحس بيا فى دمك
وتحتاج لى وتشتاق لى
ولو من البعد تلمحنى
تجيلى جرى برجلك
وتفرد من الفرح يدك
تضم جسدى فى حضنك
وانسى انى والفتك
وانسى انى عشيقتك
وانسى كل الدنيا
واحس ان انا امك
ومنى حنان بدون ما يبان
تحس بيه وانا احسك
وفى حضنى انا اضمك
حبيبتك ايوه حبيبتك
وفى الحنان انا امك
تطبطب يدى على ظهرك
وتسرح يدى بانملى
تحوم مابين خصل شعرك
ودمع عنيك على كتفى
يسيل من شوقك اللى قتلك
وفاكر انك هتنسانى
انا منك انا ظلك
انا الوشم المختوم من الله
على جدار قلبك
