من اكبر المعجزات
يتحضى اقليم الخميسات
باكبر مطرح للنفايات
قالوا هادو غير زمور
كل الدواير اعليهم تدور
ما عندهم تاريخ ولا منظور
غالبة اعليهم الامية
عايشين بلا تنمية بشرية
في بلاد زمور المنسية
بين المعازيز وتيداس
نفايات طبية ما كاين باس
واهنية من اصداع الراس
زمور الخميسات غير اشلوح
مطرح النفايات مربوح
والصمت الزموري مدبوح
احنا اولاد زمور لحرار
نسعاوا لمشارع واستثمار
وما نرضاوا المهانة والعار
في الشدة انوقفوا ارجال
سول كل اوطى واجبال
وتاريخ المغرب شاهد ومازال
عيشتونا في كل اطريق مسدود
اجعلتوا اعلينا كل باب موصود
ولحكاية كل اكلامنا مردود
مطرح نفايات طبية وطنية 
تبقى اكبر كارثة انسانية 
واكبر عار للجهات المعنية
حبنا للملك والوطن اكبير 
تحت لوائوا اكبير واصغير
للخير ساعيين وكارهين كل تبدير