اشكون احنا ؟
وفين احنا ؟
في شكارة امقطعة
يسدوا بنا كل ترعة
عكاز لعمى في الظلمة
كل معلوف يزيدوه شحمة
المسكين ما ليه حرمة
غير بلاتي اتسنى تما
العام اللي جاء
يلقانا امصافين
في احلامنا تايهين
نتسناوهم ولا هما عايقين
اشكون احنا ؟
باش ابعدا يعرفونا
او حتى يسمعونا
في الانتخابات ديما يصدمونا
يدوروا دار ابدار
اقبيلة ودوار
يترجاونا ويقدموا لينا العار
وفيهم الشاري الاصوات بنهار
اه ساح العابهم
للبرلمان ضاربين احسابهم
بعد ما ينجحوا يغيروا اثوابهم
وبعدها يفقدوا اصوابهم
ها اللي يشخر في القبة
ها اللي يرفع يدو ابلا سبة
باغيين الحصانة والحبة
ويصفيوها بالغيط والجدبة
اشكون احنا ؟
ومعامن احنا ؟
التالي فيهم اصبح جلاد
انهار انهار ينصب على لعباد
هذا كركبو الاخر دارو في الجباد
لا خيمة ابقات كل ينثر لوتاد
ساح العابهم ساح
فيهم الف كذاب وسفاح
كل حزب يعمق لجراح
وكل كتلة تعطيها للنباح
ما ابقى على من اتعول
كلها باقوال يتقول
وما كاين ما اتسول
الشعب باغرايبهم امهول