عندى كلام يا ناس
عاوز أسمعهولكم
حسوه بكل أمانه
أنا مصرى وباموت
فى تراب بلدى
وكنت
عايش ف زنزانه
كان الفساد يا ناس
فارد جناحاته
مالك زمامنا
وكأنها دكانه
خيراتنا نهبوها
زرعتنا أكلوها
ف كرشه أموالنا
وزرعنا بستانه
أيام كانت ماسخة
نظام سكته فاسدة
يا تعيش تابع ليهم
يالدبح والمنفى
وف يوم و النهار داير
بشمس ثوره فى يناير
وبدم شهدا ف الدروب فاير
صار راس النظام غاير
قلنا نحافظ ع الثورة
ننهى فساد وناس جايره
شعب وجيش على المسرح
وايدين تساعد افكار تطرح
فاسدين زمان متربصين بينا
بيوقعوا بيننا بيهدوا أمانينا
مسرحنا صارت أركانه رباعية
ثوا ر وجيش خالصين العزم والنية
وراكبين موجه كتير وفلول حرامية
ثوار عايزه تغير
ياناس وده حقهم
وجيش حركته بطيئة
ف سياسة بنزقهم
وراكبين موجة ف كل أوان
حصدوا شقاهم ودمهم
وحرامية نظام انتهى
بيعكروا الميه
بين الثوار والجيش
بيحفروا خيه
يا قادة العسكر
احنا بنثق فيكم
لكن هناك عسكر نظام
حربه موجه ليكم
اصلاح سريع قوموا بيه
يزيد الثقة فيكم
امحوا الفساد كله
واقطعوا جذوره
حاكموا فلول النظام
من راسه لذيوله
حتلاقوا شريف البلد
دايماً فخور بيكم
اوعوا تسيبوا الفرصه
لفلول نظام طارشه
وتضيعوا الثوره
بنواياكم الخالصه
نوايكوا خالصه
لكنها مش كافيه
بطيئه وبتدى
للفاسدين فرصة
خايف
خايف
باعيدها تانى
من كل وجدانى
لتضيعوا الفرحه
لتضيعوا الثوره
وتعيدوا أحزانى
عايز
عايز شويه عزم
عايز إداره بحزم
ف وش الفساد وبحسم
تسندوا الثوار
وتدعموا الأحرار
ولدم الشهيد اللى فار
حقه يعود بالأسم
قمنا بثوره كريمه
وعنها ح ندافع
وبكل صوتنا وعزمنا
حيضل الزمن سامع
حنشيل عنكوا القناع
وحسابكوا مننا رادع
فلول النظام راح تنتهى
عشان نجمنا ساطع
ونجم الفساد خانع
صبرنا لكن صبرنا نفد
ولازم يحقق وعدنا من وعد
ولازم نحاسب كل من للفساد سند
وراح نبنى بلدنا ونجهز لها العدد
ودم الشهيد السعيد ما يضعش من غير سند
خلص الكلام يا ناس
ويا رب ناس تفهمه
خارج من الاحساس
وعارف ايه مقصده
ثورتنا دى عزنا
وبلدنا دى موعده
وعنيا مش حتنام
الا بعمل نوجده
