ارفعى الراس للسما
ناطحى النجوم
يا دايسة على كل العدا ماتهونى يوم
ولا تنحنى هامة ولاد
متجرعين العزه من ايدك كاسات
ست البلاد
واحنا الولاد
المحتاجين المشتاقين لحظة حنان يا حنينه
روحنا فداكى ودمنا
يا امنا
يام الولاد العرقانين
وسط المزارع والمصانع والحجر
احنا العيون السهرانين
ليلك على ضى القمر
يام الحضارة والهرم
يا تاريخ على جبينا اترسم
مجد وكرم
عزة وحنين
وسنين ما تمحيها السنين
لو لحظه نبعد عن عيونك مشتاقين
نرجع فى يوم
نرجع نبوس حتى التراب
وندوس على هموم البعاد
واحنا فى حضنك يا امنا
وعشانك انتى يا غاليه بس
نقول فداكى عمرنا
