القلب البور
...........
بيمُر العمر بحاله ندور
ونلف ندوّر ف الإنسان
على حاجه خفيّه ما بنشوفهاش
معجونه حنين وأمان وحنان
وتعدّي علينا سنين وسنين
بنعافر مع موج الأحزان
وعشان جوّانا الحُب كبير
بندوّر .. على سر الوجدان
بنقابل ناس زي ملايكه
بقلوبها الأبيض م البفته
بتاخدنا على السكّه السالكه
ولا تستنّاش شكرا حتى
ونقابل ناس مالهومش مثيل
ألوانها كتير تايهه التفاصيل
من شكل النور لسواد الليل

تتمرمغ على كل الألوان
وتعدّي علينا سنين وسنين
بنعافر مع موج الأحزان
إنما كان حظّي أقابلك ليه
وادخل أمواج بحر عينيكي
سلّمتك قلبي اللي دبحتيه
وانا شايف خنجر ف إيديكي
دنا كنت بموت ف جليد أمشير
وابعتلك روحي تدفّيكي
وتعدّي ساعات الليل سهران
واستنّى الصبح عشان خاطرك
وان لحظه لقيت قلبك حيران
كان قلبي يروح جري يشاطرك
أزرعلك شمس دفاها جميل
وتصُبّي عليّا بحور مطرك
بإيديا هدمت جبال الخوف

بإيديكي طرفتي عيون الشوف
وعشان م انا قلبي بشوق ملهوف
رميتيه ف طريق ...
مالهوش عنوان
وتعدّي علينا سنين وسنين
بنعافر مع موج الأحزان
كان حلمي أعيدك من تاني
من بعد ما كان قلبك مكسور
كان أملي تضّمك أحضاني
وازرع ف طريقك شجر النور
كان حلمي كبير ولا كُنت اعرف
إن انا حبّيت القلب البور
وان انا مخدوع لمّا لقيتك
ف عيوني كما الورد الصابح
وما شوفتش جنب جمال عودك
الشوك اللي مؤكد جارح

بسذاجه زرعت ف بحرك نور
والزرع ما يطرحش ف مالح
ف ثواني الحلم صبح كوابيس
وطريقك عتمه بدون فوانيس
أشجار النور صبحت دبابيس
ف الدم تقطّع ف الشريان
وخلاص ما بقاش قلبي يعافر
بقى ميّت .. ف بحور الأحزان

سيد منيرعطيه
من ديوان ((منتهى اللذه))