خانـﮔـني الوكت
خانـﮔـني الوكت كلش وأدور عليك...
محتاجة ارتمي باحضانك ولو دقيقة...
كل طريق امشي بي ينسد بوجهي...
والملم همومي وتلمع دمعة أنيقة...
ما أخليها تنزل ويشمت عدوي بيه...
ولا يتألم محبوبي ويشوف الحقيقة...
لازم أظل مثل ما آني ﮔـدام الناس...
الضحكة ما تفارﮔـني وأمشي أنيقة...
ومن اختلي بنفسي أشتاقك وحدك...
تكون يمي وأحـﭼـيلك جروحي العميقة...
تمسح دموعي وتـﮔـولي آني يمـﭻ حبيبتي...
لا تهتمي حزامـﭻ آني بكل شدة وضيقه...
حبيبة عمري انتي وما أعوفج أبد...
ودمعتـﭻ غالية من تنزل بكل طريقة...
الماضي والحاضر وكل شي إلي...
إنسي الحزن وتذكري أيامنا العريقة...
من نوﮔـف على دجلة ونسولف سوالفنا...
ﮔـبل ما تشب نار الكَلب بالفراﮒ وحريقه...
محتاجتك حيل تسولف وياي ذيـﭻ السوالف...
بنفس اللهجة والحنية اللي عليه دوم تريقه...
أريد اشبع من صوتك وحنانك وكل شي...
بيك أحبه وأهواه يا نظر عيني وبريقه...
عشـﮒ الصغر وأول عشكَ يختلف هواي...
عن كلمات هالايام عن الحب والعشيقة...
ما يفهمون الحب عهد بين اثنين وعمر...
مو صورة وﮔـعدة وكلمة أو أي صديقه...
الحب وفه حتى لو مو يمي حبيبي وبعيد...
حبيتك من سنين وبعدني بيك آني غريقه...
من أشوفك أنسى الناس وكل الموجودين...
أنسى الشمات والعذال وكل فريق وفريقه...
تصد عيني ليك واغرﮒ ببحر عيونك...
وعنك ﮔـلبي محد يـﮔـَدر يبعده ويعيقه...
..................................................هدير