شافونى الخلق مستبيع
وقالوا خلاص 
صبح مجنون
دا شكله عاشق و بيهذى
وعقله مالفراق مفتون
أسير الشمس بضياها
وعطرك فيا مالى الكون
وطن شامخ سكن أرضى
وجوه ترابه بتمنى 
أكون مدفون
غريب عن أهلى عن ناسى
ورشق بقلبى سيف مسنون
بحبك ايوه يا بلادي
وعشقك قلبى 
منين مابكون
مصر جميلة الجميلات
عظيمه في قلبي للممات
يقدر يوصفها ازاى قلمى
وقلمى سارح فى الآهات
آهات فى جمالها وعيونها
و آهات على حالها ملى فات 
الله على فجرها ونيلها
وحواريها في صحبة الجارات
اتصنع التاريخ فيها
وبيتجدد مع اللحظات
رسمت عيونك الحلوه
ورحت أقولها 
فى كام غنوه
لقيت قلمى بيسألنى
دى مصر جميلة الجميلات
حتقدر تقولها فى كام غنوه
وشوية كلمات
مصر النضال والعزه والكرمات
حتقدر تحددها بشوية عبارات
مصر الأدب والدين والمنارات
فى السما سابحه تضوى
مع النجمات
مصر حبيبتى أميرة الاميرات
بعشقها حتى فى شدة الأزمات
مصر الحضارة والتاريخ 
الميه عذبها وملحها بيتعانق
بلا اختلاطات
أمنها ربى وعزها فى قرآنه
وسكنها موسى 
وسار عيسى والعدرا فى الطرقات
ومع يوسف صمدت
ومعاهم اتصنع فيها المعجزات
وفى ثانيه وقف قلمى
وحاورنى
كفايه عليا كده
خلاص سبنى
دا حبها فاض 
وحبرى انتهى
وحتعدمنى
قولتله 
دا عشقها رشق فى القلب
ولو ماحكيتش حيقتلنى
قالى
خلاص دور على قلم تانى
يكمل مشوارك
وينجدنى. .زينب محمد