وسط عالم إفتراضي
كنت عايش
كنت راضي
كان خيالي كون وأكتر
قلبي كان ف الدق هادي
كانوا كل الناس صحابي
كان مافيش أبدا أعادي
كان جامعنا الشِعر إخوه
كان لاممنا ف حُضنه عادي
كنت حاله تانيه خالص
حاله أجمل م الحاله دي
بعد ما شوفتك قُصادي
إختلفت ف كل شئ
قلبي أوّل مره يبقى
دق نبضُه ماهوش برئ
 
راحوا كل الناس طريق
إنما وحدي ف طريق
قلبي أول مرّه فعلا
يبقى م الأخر جرئ
شاف عينيكي بسرعه قالك
إنُّه حبّك
إنُّه عشقك
إنُّه ساب كل اللي عَندُه
حتى عِندُه لجل خاطرك
ساب حياته وجه يشاطرك
كل لحظه من حياتك
قال ح يبقى معاكي ضِلّك
تبقي ذاته ويبقى ذاتك
قال ح يفتح حُضنه نهرك
قال ح يصبح قلبه زادك
إنما إخلاصه زادك
 
ألف درجه ف التعالي
والمصيبه قلبي سامحك
مد إيده وقال تعالي
جيتي لكن مش عشانه
نظرتين ف عنيكي بانوا
إن قصدك تطعنيه
والغريبه قلبي شافك
وانتي واقفه بتدبحيه
إنما ما قاومش أبدا
بس طالب حاجه واحده
بعد موتُه كفّنيه
واقفي نُص دقيقه واقري
آيه م القرآن .. عليه
سيد منيرعطيه