لو حسّه عايزة تغضبي
مش ح امنعك
ولا ح ارضى أبدا أجبرك
تمشي ف طريق
مش راضيه بيه
وان كسر قلبي ح يسعدك
قومي اكسريه
وحياة غلاوة حُبّنا
ما ح اقول عملتي ف قلبي إيه
ولا حتى ليه
ماهو ملك إيدك من زمان
ف ان كنتي عايزه تجرحيه
روحي اجرحيه
وانتي اللي بعد ما تجرحيه
ح تطببيه
ف ان كنتي عايزه تغضبي
مش ح امنعك
ولا ح اوصفك يوم بالجحود
ح افضل بكل الشوق أجود
دا مافيش فراشه مهما كان
تقدر تعيش من غير ورود
وانا قلبي مفتوح الحدود
ممدود عشان تتمشّي فيه
يعني ان حاولتي تكسريه
ح تلاقي نفسك ف المطر
جيتي قوام تتدفّي بيه
طب عايزه تاني أقولك ايه ؟
سهل الكلام لكن أكيد
الحب مش حبّة كلام
يحفظ حروفه المغرمين
لو حتى عاشوا ألف عام
يتكلموا .. دول كدّابين
الحب وحياتك إمام
واحنا وراه ..
بنقول أمين
ف ان كنتي عايزه تغضبي
مش ح امنعك
ولا ح اسألك إيه غضّبك
أنا بس ح افتح قلبي شوق
يا تخُشّب فيه
يا تدبحيه
ورّيني لحظه ما تشوفيه
ح تقولي إيه
سيد منير